Gold medal beiseitu Fraser-Pryce

Hmeichhe 100m intlanisak huanga world champion vawi li ni tawh Shelly-Ann Fraser-Pryce chuan Tokyo Olympic a thlir a, beiseina sang tak nen Japan khawpuiah hian gold medal a lak theih a beisei thu a sawi.

Kum 33 mi Fraser-Pryce hian fapa Zyon a neih avangin kum hnih chhung vel chu infiamna a chawlhsan lailawk, nikum kumtir lam khan rawn kir lehin September thlaa Doha khawpuia neih World Championship-ah pakhatna dinhmun a luah leh thei tawh.

Hmeichhe 100m bikah chuan World Championship leh Olympic-a champion thei upa ber a ni mek, a thlen chinah a la duhtawk lo - Jamaica tan gold medal lak leh ngei tumin a inbuatsaih mek.

Fraser-Pryce chuan, "Hmasawnna tur lai chu a la awm zel, chumi insiamṭha tur chuan hun pawh a la awm. Tunah hian tih theih ngei tumin thapui ka thawh mek, mihring lam taka ka tih chak leh thlakhlelhte pawh infiamna vangin ka kalsan mek rih a ni," a ti.

Beijing 2008 leh London 2012-ah te khan Fraser-Pryce hian 100m huangah gold medal a lo la tawh, Rio 2016-ah erawh kha chuan Jamaican nula Elaine Thompson leh American mi Tori Bowie te a umphak loh avangin bronze medal a la.