Gopichand-a'n Mizo naupang training pe

Mizoram Badminton Association leh NEIDA Tata Trusts in an kalpui mek 'Badminton Initiative Mizoram' chu hripui leng vanga chawlh lailawk reng a nih hnuin kar hmasa aṭang khan online video communication hmangin naupangte'n training an nei leh ṭan. Indian Badminton Team Chief Coach nilai Pullela Gopichand chuan video hmnagin training a pe ṭhin.

Badminton program hi kar tin neih ṭhin a ni a, hrilengin ziaawm lam a pan a, coaching centres hawn phal a nih leh hma chu kalpui tum a ni. NEIDA Tata Trusts Regional manager B. Lalrinkima chuan, "Mizo naupangte'n hripui leng kara mahni in lum ngei aṭanga 'World Class coaching' an dawng thei hi a lawmawm a, an hlawkpui ngei pawh ka ring," tiin a sawi.

Badminton Initiative Mizoram hi Mizoram Badminton Association, NEIDA Tata Trusts, Pullela Gopichand Badminton Academy leh Mizoram State Sports Council ṭangkawpin kum 2018 aṭanga an kalpui a ni a. Tun dinhmunah Mizoram chhungah Grassroots Centres 40 leh Regional Development Center pahnih awm mekin, naupang 1450 chuangin Certified Coaches hnuaiah badminton an zir mek a ni.