India chhanchhuaktu Lalremsiami
Commonwealth Games 2022 khelh mekah Mizo hmel a mawi leh ta. India hmeichhe team chuan semifinal lut turin group match hnuhnung berah Canada an hneh ngei a ṭul a, minute 50-naah pawh 2-2 a la nih avangin an dinhmun a derthawng hle. Hun pawimawhah Mizo nula Lalremsiami Hmar a rawn inlar a, minute 51-naah chakna goal khungin semifinal an luh theihna chhan a ni bawk.
Remsiami a special
India hi England, Canada, Wales leh Ghana nen group khatah an awm ho a, a sang pahnihin semifinal an lut dawn. India leh Canada hian Ghana leh Wales hneh ve ve mah se England an hneh loh ve ve avangin semifinal hi an pahnih inkarah chinfel a ṭul.
Canada hi India aia an goal difference a ṭhat zawk avangin semifinal lut turin draw a tawk a, India tan chak ngei a ngai thung. Chak mamawh India-in bul an ṭan ṭha a, minute thumna leka Salima hmanga hma an hruai hnuah Navneet Kaur-i'n minute 22-naah goal hnihna a khung belh.
India-in tlarhnung an tihphui hmain Canada tan Stairs-i'n minute 23-naah siphurh a sut ṭhen nghal a, inkhel boruak sangah Haughn-i'n minute 39-naah siphurh a sut zo. India an hlauthawng. Hun pawimawhah Remsiami a inlar, India lawmna siam fo tawhtu hian minute 51-naah goal pawimawh a khung a, India a chakpui bakah semifinal a hruai thleng.
Remsiami leh a ṭhiante hian semifinal-ah pool B-a an khingpui zawng zawng hneh vektu Australia an hmachhawn dawn a, final thlen a harsa dawn. Semifinal hi August 5, Zirtawpniah khelh tur a ni.
TT-ah Gold
Commonwealth Games 2022 neih laiah India mipa table tennis team chuan gold medal an hlawh chhuak. Champion turin India hian TT thiam ram Singapore chu 3-1 in an hneh a ni.
Nimin tlai thleng khan India chuan gold medal panga an la tawh a, bronze (5) leh silver (3) nen a vaiin medal 13 an la tawh. Hmahruaitu Australia erawhin gold medal ringawt pawh 42 an la tawh a, an dinhmun a inthlau rih hle.
Team Champion
Doubles pair Sathiyan Gnanasekaran leh Harmeet Desai ten India tan bul an ṭan fuh, Yong Izaak Que leh Ye En Koen Pang lakah hnehna changin 1-0 in hma an hruaipui.
Mahse, singles player ṭha Sharath Kamal chu ban vei lam hmang thiam Clarence Chew lakah, 7-11, 14-12, 3-11,9-11 a tlawmin ram pahnih 1-1 in an inhnehtawk.
Tawnhriat nei ṭha Kamal a chak loh hnuah Sathiyan rawn ding chhuakin, doubles huanga hnehna chang tawhtu hian singles bikah pawh hnehna chang lehin India hma a hruai nawnpui - inkhel pawimawhah Harmeet chuan Zhe Yu Clarence Chew 11-8, 11-5, 11-6 in a hneh leh bawk.
Commonwealth Games 2002 aṭang khan TT hi telh a ni a, India mipa team hian medal vawi sarih an lakna niin, gold medal bik chu a vawi thumna a ni. Tun hnaiah a zawnin an champion - India tan chuan inelna hlu bik zinga mi a ni.
Badminton lam
TT team inelnaah India chuan Malaysia an hneh a, badminton team inelna lamah erawh Malaysia lakah hian 3-1 in an tlawm thung. India tan hian chak tura rinkai Kidambi Srikanth chu singles match-ah a chak lo.
Inelna hi best of five hmanga khelh a ni a, chak zawk ni turin match thumah hnehna chan a ngai. India tan beisei ang ngeiin PV Sindhu chuan Goh Jin Wei chu 22-20, 21-17 in a hneh, mahse inkhel dangah thlawptu a nei ṭha tawk lo a ni.
Men's doubles pair Satwik Sairaj Rankireddy leh Chirag Shetty te bakah women's doubles pair Treesa Jolly leh Gayatri Gopichand te an chak lo bawk. Match li an khelh hnuah India hi 3-1 a an hniam tawh avangin mixed doubles khelh a ngai lo.
Team inelna lamah gold medal la chiah lo mah se PV Sindhu chu an thlen chinah a lawm a, singles lamah ṭha zawka inlan a tum ang. Commonwealth Games neih leh hunah pawh team inelna huangah hmasawn an tum thu a sawi bawk.