Substitution panga hmang zel dawn

Football khawvela thuneitu sang ber FIFA chuan 2020-21 season tawp thleng atan match khata substitute panga luhtir theihna dan chu hman an remti a, hman chhunzawm zel leh zel loh chu league tinin an duhdanin an kalpui thei ang. 

Covid-19 in football khawvel a tihbuai avangin a hunah league pawh season dang zawng aia rei khelh a ni hlawm a, fixture pawh a tawt hlawm hle. Hei hi hriain FIFA chuan player inhliam tam tur ven nan substitute panga hman theih turin thutlukna a siam a, Premier League-ah pawh he dan hi an hmang mek. FIFA ruahman ang chuan he dan hi August 2021 thleng hman theih a ni dawn - chumi awmzia chu nakkuma khelh tur European Championship leh Copa America pawhin he dan hi an hmang thei dawn tihna a ni. Football thuneitu sang FIFA chuan thuchhuah siamin, "Season ṭan hma theih a nih dawn loh avangin 2020-21 ah hian game a hautak dawn tih kan hria a, international tournament lian tham a awm dawn avangin season zawh tlai a theih dawn bawk si lo a ni," an ti a, an thutlukna chu player-te himna tur a nih thu an sawi.