July 25 aṭangin Premier League bazar

Premier League leh English Football League nipui transfer chu July 27 aṭanga October 5 thleng hawn a ni dawn tih puan a ni a, hei hi FIFA-in a pawmpui phawt a ngai thung. 

Hei mai hi a ni lo, October 5-16 inkarah tualchhung transfer hawn a ni dawn bawk a, hei erawh EFL Club (Championship leh a hnuai lam zawng) tan niin Premier League club tan indawr tawn theih a ni lo - EFL club aṭangin player an lei thei thung ang. 

Premier League chuan, "Tualchhung transfer bik hi chu EFL tana tih a ni a, Premier League club pahnih inkarah bazar theih a ni dawn lo," an ti. Hetihlai hian EFL chuan July 27-ah transfer bazar hawn ni mah se 2020-21 season ṭan hma chu player-te an club thar tana an khelh theih loh thu an sawi a, hei hian Premier League khel tur zawnna Championship playoff a huam ang.

 

Premier League leh EFL-in nipui transfer bazar hawn hun an puan rual hian season thar ṭan hun tur erawh an la sawi thei lo a, September 12 chu season thar ṭan ni tura rinhlawh ber a la ni reng thung.Hriat tel tur erawh August thlengin Premier League club ṭhenkhat chuan match khelh tur an la nei nual dawn a, August 1-ah FA Cup final khelh tur niin Champions League leh Europa League-ah Manchester City, Chelsea, Manchester United leh Wolves an la dam bawk.