Man City chakpuitu Silva hun a liam

Manchester City chuan Nilaini zan khan Etihad Stadium-ah Bournemouth 2-1 in an hneh. City goal hmahruai hi David Silva-a'n freekick aṭanga a khung a ni a, Spanish midfielder hian Gabriel Jesus goal khung tur a siamsak bawk.

Premier League relegation zone-a awm Cherries-in hun tawp thlengin theihtawp an chhuah a, minute 88-naah Man City academy chhuak David Brooks hmangin siphurh sut ṭhen mah se point an hlawhchhuak zo lo.

Minute rukna lekah David Silva-a'n a ke veilam hmangin freekick mawi zetin a khung a, Spanish midfielder hi kum 34 mi a ni tawh nachungin a la thiam reng.

Cherries an beidawng lo a, Premier League khelh zel an duh tih a lang. Junior Stanislas freekick ṭha zet chu Ederson-a'n khawih fuh hramin goal ban a per hnuah Brazilian keeper lu hi fuhin goal pawn lamah a kal hlauh.

Mikhual team-in chance ṭha an nei chhunzawm a, Dominic Solanke-a'n goal ngei tura ngaih chance ṭha bik chu a khawhral. Man City tlarhma erawh goal hmaah an ke a hmui hle, minute 39-naah Jesus-a'n Silva hnen 

aṭanga a ball hmuh chu Cherries defender bum nan hmangin goal class a khung.

Second half-ah Joshua King-a'n Stanislas thawh ṭhat chu goal-ah a chantirah inngai mah se offside vangin pawm a ni lo. VAR hmanga ennawn a nih hnuah a offside-na hi a ke hmawr chauh a ni a, an vanduai hle. Man City forward Gabriel Jesus pawhin penalty a hlawh chhuakah a inngai a, VAR hmanga ennawn a nih hnuah Brazilian forward hian defender Steve Cook a rap zawka a lan avangin an sutsak. Minute 88-naah Cherries beiseina siam turin Callum Wilson siam chu Brooks-a'n goal-ah a chantir a, goal dang hmuh tur a awm tawh lo.

Manchester City-in Inrinni zanah Arsenal nen FA Cup an khel dawn a, Pep Guardiola-a'n player ṭha ṭhenkhat a awltir. Chutichung chuan khelmuala la inlante hi player ṭha tak tak an ni a, David Silva pawh danglamna a la ni pha. Spanish midfielder hi media lam pawhin season tawpa a chhuak tur hi a ui ngang a ni ang, cham dan kawng a awm em tih Pep-a an zawt hial.

City boss Pep Guardiola chuan, "Tun hnaiah a khel ṭha em em a, inkhel bul a ṭanna inkhelah goal a khung ve ve. Amaherawhchu chhuak turin thutlukna a siam tawh. Kum 10 a hman zawh a hmun danga kal a duh a, a thutlukna ka zahsak ang. Ka duhthusamah chuan Man City tana a inkhel hnuhnung lam hi mipuiin rawn ṭawiawm thei ula, khelhna hmun chang thei zel se ka duhsak bawk," tiin Silva chelh a tum loh thu a sawi.

David Silva hian kum 2010 khan Valencia aṭangin Man City hi a zawm a, English club tan hian match 431 khelin goal 76 a khungsak. a. Premier League-ah vawi thum, FA Cup-ah vawi hnih leh League Cup-ah vawi nga a champion pui tawh a ni.