Juventus an chak zo lo

Italian champion Juventus an kaltluang hlei thei lo. Old Lady hi Nilaini zan khan Sassuolo nen 3-3 in an inhnehtawk, chak zo lo mah se an elpui Lazio chu Udinese nen goal awm loa an inhnehtawk ve tho avangin Juve dinhmun a derthawng phak lo.

Mapei Stadium-a inkhelah Juve lam an che fuh hmasa, Danilo-a'n minute ngana lekah corner aṭanga ball lo kal chu box pawn aṭanga a pet luh hnuah Gonzalo Higuain a inlar. Miralem Pjanic-a through ball fing tak chu Argentine striker hian minute 12-naah an goal hnihna a khung a ni.

Goal hnih an phurh hnuah Sassuolo an zam bik lo, goal zawna pet an neih hmasak berah Filip Djuricic chuan a khung. Second half tir lamah Domenico Berardi chuan freekick chhuih lutin si phurh an sut zo a, hnai tak aṭangin Francesco Caputo-a'n an hmahruaina goal a khung.

Khualmualah Juve chu mualpho mai thei an ni, amaherawhchu Alex Sandro chuan an goal thumna a tauh lut ve leh. Hun tawp lamah Sassuolo lamin nawr chhunzawm viau mah se goal an sual chhuak zo tawh lo, team pahnih ten point khat ve ve in an insem. 

Wojciech Szczesny-a'n an goal a lut tur vawi sarih ngawt a dang a, 2014 March thla hnu lamah Juve keeper zingah Serie A match pakhata 'save' ngah ber a la ni - European football khelh beisei Sassuolo lamin an nawrna tih a chiang.

Juve thiampuipa Cristiano Ronaldo-a'n kumin March thla hnua a vawi khat nan league match a khelhah goal a khung lo. Portuguese forward hian coronavirus vanga an chawlh hnuah match ruk khelin goal sarih a khung leh der tawh a ni.

Maurizio Sarri naute hian Serie A match 33 an khelh tawhah point 77 hmuin hma an hruai mek, khelh zat inangah pahnihna Atalanta aiin point sarihin an sang zawk - palina Inter Milan chuan khelh hmabak an neihah hnehna an chang a nih chuan pahnihna dinhmun an luah thei ang.

Champion beisei hman ve mah se hun pawimawh laiin Lazio an che fuh hleithei lo. Nilaini zan kha Udinese mualah lenglutin goal an khung thei lo, point khat chauh an hlawhchhuah avangin pathumnaah an awm; palina a thla hniam thei an la ni.

Lazio manager Simone Inzaghi chuan, "Kan theihna zawng zawngin kan khel, a bik takin hun chanve hma lamah phei kha chuan kan bei ngawrh zual hle. Mahse vanneih loh ṭum hi a awm ve a ni, goal hmaa kan hriam tawk lo kha kan tuar," a ti.

Inkhel dangah AC Milan chuan an mikhual Parma 3-1 in an hneh. Milan hian point 53 neiin pasarihna dinhmun an luah a, pangana AS Roma nen an inkarah point li chauh a awm; khelh hmabak match panga an la neih avangin European football an la beisei sang hle.