Vawiinah CYMA Football Final ; Ramhlun South Vs Chanmari

Mizoram chhunga veng-khua football hmanga inelna ngaih hlut ber TṬ Royte Trophy - Inter Branch YMA Football Tournament final chu vawiin hian Lammualah khelh a ni dawn.

Tlai dar 3:00-ah closing cere­mony ṭan a ni ang a, darkar chan­ve hnuah Ramhlun South leh Chanmari ten champion nomawi an inchuh ang. Inkhel en man hi Rs 30 chauh a ni a, Zonet leh LPS-in live-in an pe chhuak ang.

Tu nge lian zawk?
Kum 1985 khan CYMA Football hi khelh ṭan a ni a, Chanmari hian 1989 leh 1990-ah kum zawnin final lut mah se nomawi an chawi lo.

Kum 2000 hnu lamah Ramhlun South chu team ṭha zinga chhiar tel an ni ziah a, amaherawhchu rinkai nichungin final an thleng pha ṭhin lo. Ramhlun South-in kum 2008 khan a vawi khat nan CYMA Football final an thleng a, Republic Veng hnehin a vawi khat nan an champion. Tun ṭuma coach HC Zarzoliana hi an champion ṭuma captain a ni.

Tualchhung football a nung tawk lo a, Mizoram Football Asso­ciation-in veng-khua inelna Red Ribbon Football hmangin football thi tur an chawi nung a, Lammual artificial turf phah nen an innan chhoh avangin mipui lam pawhin inelna hi an ngaihlu hle.

Red Ribbon Football 2012-ah Chanmari an champion a, tun hmaa inkhelh thiam veng tia sawi lar ṭhin Chanmari kai thawhin an awm. An veng hming chawi club Chanmari FC chei hnum nghalin Mizoram Premier League-ah team langsar niin vawi hnih an champion tawh a, Mizoram league sang bera champion lai club awmna veng a ni.

Ramhlun South-in player ṭha rual an kawl thung a, hei bakah hian Aizawl DFA first division-ah Ramhlun FC an nei a. Veng-khua inelna NECS Cup-ah vawi thum final lut tawhin vawi hnih an champion tawh a, Ramhlun South hi tualchhung football-ah an lian. An khingpui tur Chanmari nen tu nge lian zawk tih chu a tehna a zir a ni tawh ang.

Rinkai Ramhlun South
Ramhlun South-in semifinal second leg-ah an player pawimawh Lalmawizuala an chhawr thei lo a, final-ah erawh kim ṭhapin an khel thei tawh dawn. Chanmari erawh hun pawimawhah an kim lo hle.

Chanmari hian India Under 23 team-a koh vangin Jerry Mawi­hmingthanga an chan tawh a, ani bakah hian defender pawimawh C. Lalmuanawma leh Lalhriatrenga (Achia) te hrem vangin an khel thei dawn lo.

Kim ṭhap pawha squad nei ṭha zawk Ramhlun South hi chak tura rin an ni. Coach HC Zarzoliana'n Chanmari tlarhnung ṭhawng turin Malsawmfela, Lalnunmawia, Van­lalthlamuana, Lalawmpuia, Lal­remruata leh R. Lalthanmawia te a kawl a, midfield-ah tawnhriat nei ṭha Samson Ramengmawia leh Mawizuala te neiin tlarhnungah Aizawl FC defender Zohmingliana Ralte leh Ramhlun North FC captain Lalramthlamuana te an inkawp thei bawk.

Amaherawhchu Ramhlun South hi final thleng turin ṭum hnih penalty shootout hmanga an vanneih a ṭul a, semifinal-a Chhinga Veng an hneh ṭum pawhin first leg-ah an inhnehtawk.

Ramhlun South coach HC Zar­zo­liana chuan, "Kan chak chho ṭawk ṭawk hi kan player thlirin mak deuh mah se kan tan chuan a ṭha zawk a, hei vang hian 'over confidence' kan neih loh phah. Final-ah pawh dinhmun ṭha zawkah ding mah ila, kan khing­pui tur coach hi Chawnga a ni a. Ani hi coach thawkrim leh tawnhriat nei ṭha a ni, player pa­hnih a chhawr theih loh avang hian a buai phah lo ang," tiin nomawi chawi tura theihtawp chhuah an la mamawh thu a sawi.

Beiseina nen Chanmari
Chanmari coach Chawngthan­sanga'n Ramhlun South coach Zara bakah an player pawimawh Samson-a, Zotea leh Mawitea te hi a enkawl tawh a, a khingpui tur team hian an hriatchian ang bawkin a hre chiang ve bawk.

Chawnga chuan, "C. Muana hi player pawimawh a ni char char a, Achia pawh pawimawh mah se khel loh ṭum a nei. Kan team hi kim ṭhapin kan khel hlei thei lo a, heivang hian kan tan chuan kim lo a khelh hi thil thar a ni lo. Amaherawhchu Ramhlun South hmachhawn tur chuan game plan uluk lehzual a ṭul dawn a ni," tiin Vanglaini a hrilh.

Chanmari hian an veng fapa rangkachak Rochhingpuia, DSK Shivajians midfielder Lalhriatpuia, Mizoram captain Lalrinchhana, keeper tawnhriat nei ṭha MS Dawngliana, rawlthar duhawm Lalnunzama leh Round of 16 china goal thum khung tawh Rosangliana te an kawl avangin nomawi chawi an inbeisei a nih pawhin phu loh beisei chu an ni lo ang.

Mipui lam
Ramhlun South-in kawr sen nen Lammual an pan dawn a, semifinal-ah pawh an tam tawh avangin final-ah an tam lehzual ang. An ṭhutna tur chu K. Kawla Stand leh S. Malsawmtluanga Stand a ni.

Kawr var nen Chanmari an thawk chhuak dawn a, 'Chanmari vul zel rawh se' tih banner lian tak nen an team an ṭawiawm dawn. Chanmari FC khuang lian nen an team an au phur dawn a, Red Ribbon Football 2012 leh MPL-a an chet dan tawh dan thlirin khelmual pawn lamah an ngaihtuahawm loh.

RAMHLUN SOUTH
Round of 128
Ramhlun South 12 - 0 Lungdai
RAM : R. Lalthanmawia 2', 22', 24'; Lalromawia 7'; Lalthlamuana 8', 19', 69'; Lalremruata 11', 16'; Lalmawizuala 30'; Lalnunmawia 52'; Lalramdina 67'
Round of 64
Samtlang 0 - 7 Ramhlun South
RAM : Malsawmfela 10', 42'; Lalmawizuala 16';
Lalremruata 35', 44', 69';
Lalṭanpuia Jongte 78'
Round of 32
Ramhlun South 3 - 1 Ramthar Veng
RAS : Lalnunmawia 12'; Vanlalthlamuana 69'; Samson Ramengmawia 90+1'
RAM : Stephen Lalnunmawia 25'
Round of 16
Lengpui 2 - 2 Ramhlun South
LEN : Rohmingthanga 29'; Zohmingliana Ralte 39' (OG)
RAM : Lalnunmawia 42'; Lalawmpuia 90+2'
Penalty Shootout-ah Ramhlun South 5-4 in an chak
Quarterfinal
Ramhlun South 1 - 1 ITI Veng
Penalty Shootout-ah Ramhlun South 5-3 in an chak
RAM : Vanlalthlamuana 56'
ITI : Vanlaltlawmlova 71'
Semifinal
Ramhlun South 1 - 1 Chhinga Veng
RAM : Malsawmfela 23'
CHH : Lalnunsanga 86'
Chhinga Veng 0 - 1 Ramhlun South
RAM : Lalthlamuana
Aggregate-ah Ramhlun South 2-1 in an chak
CHANMARI
Round of 128
Chanmari 14 - 2 Khawhai
CHA : Jerry Mawihmingthanga 19', 47', 50', 76'; Rosangliana 27', 65'; Rochhingpuia 39', 88'; Lalnunzama 45+1', 52'; Lalrinliana Hnamte 58'; Lalhriatrenga 72'; C. Lalmuanawma 79'; Lalrinchhana 81'
Round of 64
Armed Veng 1 - 1 Chanmari
ARM : Lalfakzuala 37’
CHA : Rochhingpuia 18’
Penalty Shootout-ah Chanmari 4-2 in an chak
Round of 32
West Phaileng Jt. YMA 0 - 5 Chanmari
CHA : Rosangliana 10'; Lalnunzama 29', 89'; Jerry Mawihmingthanga 31', 82'
Round of 16
Chanmari 3 - 0 Republic VT
CHA : Rosangliana 25'; Jerry Mawihmingthanga 39', 41'
Quarterfinal
Hualngohmun 1 - 2 Chanmari
HUA : Ramdintluanga 87'
CHA : Lalnunzama 68', 84'
Semifinal
College Veng 0 - 2 Chanmari
CHA : Rosangliana 27'; Lalhriatpuia 90+3'
Chanmari 1 - 1 College Veng
CHA : Rosangliana 40'
COL : Ramfangzauva 90+3'
Aggregate-ah Chanmari 3-1 in an chak