Chak tumin kan khel dawn - Jeje

India rama footballer intel khawm pawl, Football Players Association of India (FPAI) leh Mizoram Football Association ṭang­kawp chuan July 1, 2017 hian Rajiv Gandhi Stadium-ah exhibition match an khel dawn a, he hunah hian 2017 FPAI Awards sem a ni nghal dawn.

India striker Jeje Lal­pekhlua chuan Mizoram XI jersey a ha dawn a, Mohun Bagan striker chuan, "Chak tumin kan khel dawn. Mizo mipui hmaa a ṭha thei ang bera khelh kan duh a, Mizoram XI hian chak loh kan duh lo," tiin friendly match ni mah se an ngaih thu tak thu a sawi.

RG Stadium-a inkhel en man hi Rs 100 leh Rs 200 a ni dawn a, inkhela sum tling khawm hi FPAI leh MFA chuan tun hnaia chhiat tawkte ṭanpui nan an hmang dawn a ni.

Jeje chuan, "FPAI-in Mizoram an rawn thlang hi a vanneihthlak hlein ka hria. Mizoramin tun hnaiah result ṭha kan nei a, hei vang hian India ram footballer-te pawhin kan ram hi rawn tlawh an châk a ni," tiin Vanglaini a hrilh.

Inkhel tur chungchang sawi zuiin Hnahthial tlang­val chuan, "FPAI XI tana khel tur hi India rama player ṭhate an nih hlawm avangin an ṭha dawn a, chutihrualin keini lam pawh kan ṭha hle. Kan inkhel tawk khawp ang," tiiin a sawi.