MotoGP a lo kir leh ta - Rossi

Thla li chhung zet Covid-19 vanga season ṭan hun a tlai hnuah MotoGP chu Pathianni tlaiah an tlan ṭan dawn. Valentino Rossi chuan phur leh tha tho takin inelna a hmachhawn tur thu a sawi.

Rossi hi kum 41 mi a ni tawh, a vanglai pel tawhin 2021 aṭang chuan Yamaha bike pawh a khalh tawh lo ang - a aiawh turin Fabio Quartararo a lut dawn tih a chiang tawh; boruak hrang hrang karah pawh Rossi hian chiai loin intlansiak a tum.

Italian rider Rossi chuan, "A tawp a tawpah chuan MotoGP a lo inher chhuak leh dawn ta, bike khalh hlan ka nghakhlel tawh a, keimah chauh ni loin fans pawh an lawm ngei ka ring," a ti. Tawnhriat ngah Rossi hian intlansiak vawi 400 chuang a hmachhawn tawh a, tun kar tawpa an tlan tur ang erawh a la tawn ngai loh a ni - hripui leng vangin fans an awm dawn lo; a khawhar thlak khawp ang.

Yamaha team director Massimo Meregalli pawhin season an ṭan thei tur chu a lawm thu a sawi a, team ṭha dang Honda elphak turin inbuatsaihna an neih ngawrh thu leh, an bike a ṭhat tawk thu a sawi ve bawk.