FPAI Young Player of the Year-ah Jerry Mawihmingthanga leh Isaac Vanmalsawma
Football Players Association of India chuan Player of the Year Award leh Foreigner of the Year Award nominee an puang tawh a, nimin khan Young Player of the Year Award dawng thei tur player panga an puang.
Thlan bik panga zingah Mizo player pahnih Jerry Mawihmingthanga leh Isaac Vanmalsawma te telh an ni a, player dang pahnih pawh Chesterpoul Lyngdoh leh Udanta Singh pawh North East chhul chhuak tho niin, nominee-ah hian East Bengal midfielder Nikhil Poojari a tel bawk.
Chanmari Veng tlangval Jerry hian season liam ta khan DSK Shivajians tan match 18 inlan theihah match 15 inlanin goal hnih a khung. Hnahthial tlangval Isaac hi Shillong Lajong tan match zawng zawng inlan vekin goal hnih tho a khung bawk.
Heng Mizo player pahnihte hi tuna India Under 23 team tura koh mi 35 zingah an tel a, hei vang hian July 1-a Aizawla FPAI leh Mizoram XI inkhelah an inlan thei dawn lo - he chawimawina dawng tura thlan an nih pawhin ankahni chuan an dawng thei dawn lo niin a lang.
FPAI Young Player of the Year dawng thei tura thlan chhuah zingah Udanta Singh hi national team-a player pawimawh a nih phak tawh avangin AFC Asian Cup Under 23 Championship khel tur zingah koh telh a ni lo a, player dang pali zawng erawh India team-ah koh tel niin hei hian an ṭha tih a nemnghet.
Hetihlai hian season liam ta khan Bethlehem Veng rawlthar Jerry Lalrinzuala chuan Indian Super League leh I League-ah Chennaiyin FC leh DSK Shivajians tan khelin Emerging Player of the League a dawng ve ve a, mak tak maiin FPAI-in Young Player of the Year Award dawng tur zingah an telh loh.
Young Player of the Year Award
Jerry Mawihmingthanga DSK Shivajians / North East United
Isaac Vanmalsawma Shillong Lajong
Nikhil Poojari Kingfisher East Bengal
Chesterpoul Lyngdoh FC Pune City / Churchill Brothers SC
Udanta Singh Bengaluru FC/ Mumbai City FC