Arsenal-in Ozil leh Sanchez an mamawh - Pires

Arsenal tana Premier League nomawi vawi hnih chawi thei Robert Pires chuan a club hlui hian hlawhtlinna chan an duh a nih chuan Alexis Sanchez leh Mesut Ozil te contract thar an ziahpui a pawimawh thu a sawi.

Germany playmaker Ozil leh Chile interna­tio­nal Sanchez te hian Emirates Stadium-ah kum khat daih bak contract an nei tawh lo a, Europe-a club lian dangin lakluh tuma an hel lai pahnih te hmalam hun hi a chiang lo mek.

Arsenal tana league match 189 khel Pires chuan, "Sanchez leh Ozil te ang palsalṭha hi Arsenal-in an mamawh chu a ni, tun nipui transfer chhung hian eng nge thleng dawn chu la hre lawk lo mah ila Arsene Wenger hian hna a ngah hle ang tih chu thil chiang a ni," tiin a sawi.

Arsenal hi season hmasa khan Premier League-ah pangana an ni a, season tharah Champions League an khel thei dawn lo. UCL khel dawn lo mah se Pires hian Wenger tan bazar a harsat a rin loh thu a sawi bawk.

Kum 43 mi Pires chuan, "Arsenal hian hma­­sawn tur chuan sum tam tham tak senga player thar an lakluh a ngai a, chutih rualin an neih sa an chelh a ngai bawk," a ti. Pires hian AS Monaco striker duhawm Kylian Mbappe hmabak êng tak nei a nih thu leh Gunners tana khel thei tur player a nih thu a sawi tel bawk a ni.