Diamond League-ah Usain Bolt a inlan dawn

Olympic gold medal pakua la thei Usian Bolt-a'n August thlaa World Championship neih zawhah infiamna a mangṭha dawn. Jamaican sprinter hian London-a intlansiak hnuhnung ber a hmachhawn hmain July 21 hian Monaco-ah a inlan tur thu a tichiang leh ta.

Nimin khan inelna buatsaihtu lam chuan thuchhuah siamin, "July 21-a neih tur IAAF Diamond League-ah Usain Bolt a inlan dawn tih a chiang. Bolt tan infiamna khawvela a thlahna intlansiak pakhat a ni ang," an ti.

Kum 30-a upa Bolt hi tun thla tir lam khan Kingston-ah inlanin 100m chu 10.03sec a thlengin pakhatna a ni a, June 28-a inlan a tumna Ostrava-ah erawh a inlan theih hmel ta loh hle.

Khawvela tlan chak ber record siamtu Bolt hian Beijing, London leh Rio Olympic-ah te khan 100m, 200m leh 4x100m-ah te gold medal a la kawp vek thei. Mahse, 2008 Beijing-a 4x100m inelnaah erawh an tem zingah dan bawhchhia an awm avangin an medal lak kir sak an ni.