Confederations Cup Portugal chakna Ronaldo 'goal'

Real Madrid chhuahsan tur thuthang lengvel karah Cristiano Ronaldo-a'n goal khung a ṭhulh san lo - Nilaini zan khan Portugal tan goal a khung a, Confederations Cup-ah Russia lakah an ram hi 1-0 in hnehna a chanpui.

Group A-a Mexico leh New Zealand inkhelah buaina a chhuak a, Mexico-in 2-1 in hnehna an chang. Kiwis tan Leeds United striker Chris Wood chuan goal hmahruai khung mah se Mexico-in chawlhlawk hman a nih hnuah goal hnih an khung a, goal difference-ah Portugal aia an ṭhat avangin hmahruaitu an ni.

Hei le Ronaldo

Portugal-in an match hmasa berah Mexico an inhnehtawkpui a, semifinal lut turin Russia lakah hnehna chan a pawimawh tih an hria. Inkhel ṭantir aṭangin Portugal-in goal khung tumin an nawr nghal a, minute riatna lekah Ronaldo a inlar nghal - Manchester United nena sawi­zawm hlawh mek forward hian Raphael Guerreiro hnen aṭanga a ball hmuh ṭha tak chu a tauh lut.

Chawlhlawk hman a nih hnuah pawh Portugal bawk an hlauhawm chhunzawm a, inkhel ṭantir aṭanga reilo teah AC Milan striker thar Andre Silva chuan Russia goalkeeper Igor Akinfeev enchhinna a nei nghal a, ram tana a vawi 100 inlannaah Akinfeev-a'n a dang ṭha hle. Inelna thlengtu Russia-in hun tawp hnaih lamah Georgy Dzhikya leh Fedor Smolov hmangin si phurh sutna remchang nei mah se an chhawr thei lo a, a tlawm zawkah an ṭang.

Ronaldo a inthup

Man of the match-a thlan Ronaldo-a'n inkhelh zawhah media a hmachhawn ngei ngei a ṭul a, mahse tun hnaia Real chhuahsan tur anga sawi a nih avanga chanchinthar ngah tak forward hian media hmachhawn mah se zawhna chhang loin ama sawi duh chin zawng a sawi! Portugal captain hian Mexico nena an inkhelh ṭumin media a hmachhawn duh tawh lo bawk a, tun hnaia a boruak chungchang an zawh a hlauh vang a ni ber.

Portugal boss Fernando San­tos chuan a nau hi chhan nghalin, "Ronaldo hi he inelna pawn lam zawhna chhang tura beisei chi a ni lo. He hmunah hian kan inkhel chungchang sawi tur chiahin a lo kal a, a chhung­kua emaw Real Madrid chungchang sawina hmun tur a ni lo. A hmalam hun chungchang hriat in chak tih ka hrethiam a, mah se a mimal duhthlanna chu in zahsak tur a ni," tiin inkhelh zawha thuthar thehdarhtute an hmachhawnnaah a sawi.

Buaina karah Mexico

Mexico-in an striker chhuan­vawr Javier Hernandez tel loin New Zealand an hmachhawn a, mah se awlsam taka chak tura an inbeisei ang ngawtin thil a katluang lo. All Whites (New Zealand sawina)-in minute 42-na lekah goal hmahruai an khung a, Leeds United striker Chris Wood-a'n CONCACAF champion a barakhaih.

Mahse, second half khelh a nih hnuah Mexico-in chawlhlawk laiin thu ṭha an ngaihthla tih an pholang a, Benfica forward Raul Jimenez leh Mexican club ṭha America striker Oribe Peralta-te goal khung hmangin hnehna an chang. Ram pahnih inkhelah hian hun tlemte chauh a awm tawh tihin Mexico captain Diego Reyes-a'n Michael Boxall a pawh avangin buaina a chhuak a, video assistant referee hmanga ennawn a nih hnuah Reyes, Hector Herrera leh Boxall-te chu yellow card pek vek an ni.

Ngaihdam dil Osorio

Mexico coach Juan Carlos Osorio chu inkhelh laiin New Zealand coaching staff zinga mi nen an inhnial buai a, kum 56-a upa manager hian inkhelh zawh hnuah ngaihdam a dil. Colombian manager chuan, "Kan fan-te hnenah ngaihdam ka dil a, New Zealand coach pakhat laka ka chet dan kha a mawi lo hle a ni. Football-ah chuan hetiang thil duhawm lo hian hmun a chang tur a ni lo a, ka tihpalh takzet a ni. Kan game khelh kha a boruak a sang em a, ka insum zo lo a ni," a ti.

New Zealand coach Antho­ny Hudson chuan, "Zanin thil thleng kha thil thleng zen zen lo a ni a, thil thlen dan ngaihtuah kha chuan kan khingpuite player zinga mi kha ka player-te zinga miin an kiu hmangin an nghawk lui emaw tih mai tur a ni," a tiin thil hote anga lang chu buaina lianthamah an chhuah nimaia a hriat thu a sawi.