Chhinga Veng FC thawm a lian

Tualchhung transfer-a thawm nei lian ber chu Chhinga Veng FC an ni a, Mi­zoram Premier League club hian Mizoram coach Lalsangzuala Hmar an lak­­luh thu an puan hnuah player langsar an lak belh zel.

Chhinga Veng hian MPL5-a Chanmari FC champion-na kawnga pla­yer pawimawh midfielder pahnih R. Malsawmtluanga leh Lalrinchhana te an lalut a, defender Ramfangzauva'n coach Sanga hnung a zui bawk.

Chanmari FC aṭang­a player pathum an lak bakah Chanmari West FC bang rinawm R. Lalawmpuia (Mapuia), Bethlehem Vengthlang FC winger Laldingngheta leh Aizawl FC goalkeeper Zothanmawia te an ziak lut.

MPL2 best player MS-a hian Chanmari FC vawi hnih a champion pui tawh a, ball sem thiam bik a nih avangin Mizo midfielder dah san ber zinga mi a ni.

Electric Veng tlangval Lalrinchhana hi MPL5-ah best midfielder nominee a tel phak a ni a, Santosh Trophy-ah Mizoram player pawimawh a ni. Coach Sanga'n Rinchhana hi BVT tana a khelh laiin midfield-ah a chhawr ṭan a, a chet ran leh taihmak avangin avangin Chanmari FC champion team-ah leh Santosh Trophy-a player pawimawh a ni phak a ni.

Mizoram team-a left back Zautea'n ball pet a thiam a, Chhinga Veng FC-ah hmun pawimawh a chang pha ang. Season liam taa Chhinga Veng an sawiselna chu tlarhnung a ni a, defender K. Lalthlahlova leh Laldinliana bakah keeper Lalhmangaihzuala ten contract a ziah belh a, tunah Mapuia leh keeper T. Mawia te an lakluh avangin buaina ngaiah buai nawn an tum lo tih chiang hle.

Chhinga Veng hian tlar­hmaah an neih sa MS Dawngliana, Lal­khaw­puimawia, NECS Cup 2017 top scorer Van­lal­lawma leh Lalthlamuana te an chelh thei a, Chhing Cows (Chhinga Veng ṭan­tute) chuan season thar an nghakhlel tawh khawp ang.