Alves-a'n Juventus chhuahsan a duh
Juventus CEO Giuseppe Marotta chuan tun hnaia Manchester City nena sawizawm hlawh tak Dani Alves chuan an club a chhuahsan tur thu a sawi chiang. Kum 34-a upa defender hi City chuan kum hnih chhung an hnena khel tura lakluh an tum mek nia sawi a ni.
Marotta chuan, "Alves leh club hotute inkarah inhmuh thiam lohna engmah a awm lo a, players tin hian chona thar hmachhawn tur an duh vek a ni. Dani Alves pawh hian chona thar hmachhawn a duh thu a sawi a, a contract neihlai pawh titawpin a hma hun atan duhsakna sang ber kan hlan a ni," a ti a, an player la ni mek Alves thlahna thu a sawi fel der.
Brazil international Alves hian chhuak tur anga sawi a nih mek laiin Juve striker Paulo Dybala chuan Italian club chhuahsan se hma a sawn zawk a rin thu a sawi a, an player duh lai chungchanga Alves ṭawngkam vang hian Juve fan-te an lungawi lo hle.
Mahse Marotta chuan tun hnaia Alves ṭawngkam vanga Barcelona defender hlui chu chhuahtir an tum loh thu a sawi a, "Alves hi tun hnaia a ṭawngkam vang hian fans ṭhenkhatin an lawm lo tih phat thu a awm lo a, mah se club nena kan inkarah erawh engmah buaina a awm lo," a ti.
Kum 34-a upa Alves hian Barcelona aṭangin season hmasa ṭan dawn khan Juventus hi a pan a, Serie A leh Italian Cup-ah champion puiin Champions League final-ah erawh Real Madrid an hneh lo thung. Etihad Stadium lam a pan a nih chuan Barca-a a pu hlui Pep Guardiola nen an thawkdun leh dawn tihna a ni.