Bayern-in Lewandowski an hauh na

Robert Lewandowski-a'n goal khung turin a ṭhian ten an pui ṭha tawk lo niin a sawi ri zauh a, hei hian club lian dang beng a verh hle. Bayern Munich chuan an striker hi zawrh lai a nih loh bakah a chungchangah club dang nen inbiak an tum loh thu an sawi nghal bur mai.

Poland international hian Bun­desliga lamah goal khung thei bik a nih zia a lantir fo tawh a, season hmasa pawh khan league match 33 a khelh aṭangin goal 30 a khung. Mahse, Bundesliga golden boot dawng turin Bayern striker hian Borussia Dortmund hma tawng Pierre-Emerick Aubameyang chu goal khatin a tluk lo.

Kum 28-a upa Lewandowski-a thu sawi avang hian striker zawng mek Chelsea leh Manchester United hming a lang nghal a. Cristiano Ronaldo a chhuak a nih chuan Real Madrid lam pan a hreh lo nia sawi a awm zui bawk.

German champion chuan thu­chhuah siamin, "Robert Lewan­dowski hian contract a ziahna a la rei lo, Allianz Arena-ah kum 2021 thleng cham turin thutiam a nei mek. Club dang nena a chungchang sawi tur hian hun khawhral kan tum lo," an ti. Bayern hian player-in an club tana contract a nei chunga dawr lui lo turin club dang an vo nghal bawk a, FIFA dan leh hrai bawhchhiatna a nih thu an sawi tel bawk.