Eastbourne-ah Djokovic inlan dawn

Novak Djokovic chuan tun hnai kum sarih chhunga a vawi khat nan Wimbledon inbuatsaih nan grass court-ah a inkhel dawn, June 26 aṭanga khelh ṭan tur Eastbourne Open-ah a inlan ang.

Wimbledon vawi thum champion tawh Djokovic hi tun thlatir lam khan French Open quarterfinal-ah a chak lo a, he mi hnuah a la inkhel leh lo. Serbian tlangval hian result a neih ṭhat loh rei tak em avangin world number 1 aṭangin 4-naah a tla hniam tawh, kum 2011 hnua a sang pahnih zinga a tel loh vawi khatna a ni hial.

Kum 30-a upa Djokovic chuan, "Eastbourne-ah ka inlan vawi khatna tur a ni, inkhel tura sawmna ka dawn avangin ka lawm a, tihhlawhtlin ngei ka tum. Wimbledon inbuatsaihna a nih ang ngeiin ṭha taka khelh ngei ka tum ang," tiin a sawi.

Grand Slam vawi 12 champion tawh Djokovic hian kum 2015 leh 2016 tir lam khan a khel ṭha tluang hle a, tennis legend Rod Laver hnuah a ruala major title kawl khawm vek thei hmasa ber a ni hial. Mahse, tunah chuan heng a nomawi lian pali hi kawl lai a nei tawh lo.