Transfer bazar thawm a lian Hausak hmabak Terry? Atletico-ah Costa?

Nipui transfer bazar a in­hawng a, players inchuh boruak a sang leh ṭan tawh hle. Premier League bikah chuan club 'tenau' tia sawi ṭhin meuhte pawhin tun hnaia television deal aṭanga an sum hmuh a san avangin pawisa an phawrh huai a, Sunderland keeper Jordan Pickford te man zat meuh pawh pound mak­taduai 30 hial a ni ta.

Hetiang boruak karah hian player langsar tak tak hming pawh a lang nual a, 'chutah chuan a kal dawn' tih an nih hnu lawkah an kal leh loh tur thu chhiar tur a awm nghal zat zel a, transfer bazar tawp hma chu 'thil chiang' sawi tur a awm hleithei lo - tuna chiang awmchhun chu 'engmah a la chiang lo' tih hi a ni.

Hausak hmabak Terry

Chelsea-in season tawp rual­in an captain chhuanvawr John Terry an chhuah zalen a, Italian manager Antonio Conte-a chhawr duh loh defender hian khelhna tur erawh a vai lo - Birmingham City-in kar khata pound nuai khat vel hlawh tura an sawm thu an tihchian hnu lawkah Aston Villa chuan England captain hlui hi an duh nia sawi a awm.

Championship club hian kum khatah pound maktaduai nga hlawhtir an inhuam. Hei mai hi a la ni lo cheu, Premier League an inhlangkai a nih chuan pound maktaduai hnih pek belh an inhuam nia sawi a awm zel bawk - Terry-a sum bawmin tam lam a pan zel dawn niin a lang. China lam kan la sawi tel lo mah mah!

Atletico lo chu

Chelsea manager Antonio Conte-a'n season hman zawh taka a striker chhuanvawr Diego Costa chu mamawh a nih tawh loh thu a hrilh a, Spain striker tan Stamford Bridge-ah hmun a awm tawh lo. Mahse, kum 28-a upa striker hian a club hlui Atletico Madrid-ah a kir thei dawn a nih loh chuan chhuah a tum lo nia sawi a awm tlat - Conte tan buaina tur a awm zel e.

Hetihrual hian Chelsea-in tun nipui transfer-ah player lakluh an la nei lo a, Conte-a lungawi lo hial nia sawi a ni. Mahse, tun hnaia khawthlang media-te thuziak hi awih tur a nih chuan Blues hian Monaco midfielder Tiemoue Bakayoko chu pound maktaduai 35-in an lalut hnai tawh a, pound maktaduai 45 man, Juventus defender Alex Sandro an beisei mek bawk.

Leicester-ah Iheanacho?

Craig Shakespeare enkawl­na hnuaia khel tur Leicester City an reh vang vang hnuah thawm an nei a, Foxes thawm neih hi Manchester City rawlthar duhawm Kelechi Iheanacho lakluh an duh chungchangah a ni. Kum 20-a upa Nigeria inter­national manah hian Foxes hian pound maktaduai 25 thehchhuah an inhuam nia sawi a ni.

Mahse, City hian rawlthar beiseiawm Iheanacho hi chhuah phal ta tehreng pawh ni se Leicester tan awlsam taka neih theih a ni dawn lo - Everton, Crystal Palace leh West Ham te chuan Nigeria tan vawi kua inlana goal ruk khung thei striker hi an duh ve bawk.

Perisic duhtu Mourinho

Nipui transfer bazar inhawn rualin Manchester United leh Inter Milan midfielder Ivan Perisic sawizawm nghal an ni a, tun thlengin thil chiang tak erawh a awm thei lo. Khawthlang media-te thuthar berah chuan Jose Mourinho hian kum 28-a upa midfielder hi July thla tir lama pre-season tour USA a an neih hma ngeia lakluh a duh, tih a ni leh ta.

United hian Perisic lakluh tum hian Inter chu pound maktaduai 35-in an dawr tawh a, Italian club hian an midfielder hi pound maktaduai 44 aia tlawma chhuahtir an tum lo nia sawi a ni. Hetihlai hian United hian rawlthar beiseiawm tia sawi ni ṭhin Adnan Januzaj chu Real Sociedad lamah an kaltir dawn hnai nia sawi a awm bawk.

Virgil van Strike?

Liverpool-in Southampton defender Virgil van Dijk lakluh an tum thu an tichiang tawh a, mahse Saints hi Reds-in an defender an dawr danah an lungawi lo. Liverpool-in ngaihdam an dil a, an inhnuk­dawk nghal bawk. Hetihlai hian Liverpool striker ṭhin John Aldridge chuan Van Dijk chu Reds-a pan theihna tur a nih phawt chuan Southampton laka nuar mai turin thurawn a lo pe ve mek!

Coach nei loa awm mek Sou­thampton hian season thar aṭanga an coach ni turin Liverpool defender hlui Mau­ricio Pellegrino chu an dawr mek nia sawi a awm bawk a, season hman zawh taka La Liga club Deportivo Alaves coach hi Crystal Palace nen an inhnimhnai viau nia sawi a awm bawk.