Premier League : Tu zawk nge him dawn? Zaninah West Ham Vs Watford
Zanin dar 12:30 hian West Ham United-in Watford an mikhual dawn a, team pahnih hian point 34 ve ve an hmuh bakah Premier League aṭanga tla thei ve ve an nih avangin inkhel pawimawh bik a ni.
Premier League leh a hnuai chiaha awm Championship te sum lakluh hi a inthlau takzet a, chuvangin khawthlang media ṭhenkhat chuan zanin inkhel tur hi pound maktaduai 120 inchuhna tiin an sawi. Inelna hlutna hrim hrim dah ṭhat pawhin sum vang ringawt pawhin England-a football inelna sang ber khelh hi a manhla tham a, khelmual chhehvel ngaihtuah tel hian Hammers leh Hornets te inkhel boruak san turzia a hriatfiah theih a ni.
Hun bik atan mi bik
Watford chanchin sawi apiangin 2013 playoff semifinal kha ngaihtuah chhuah a awl a, kha inkhel kha 'film' chu ni se a changtupa chu Troy Deeney a ni ngei ang.
Premier League khel tur zawnna semifinal-ah hian Watford leh Foxes te an inhmachhawn. First leg-ah David Nugent-a goal hmangin Leicester an chak a, hrem vangin Troy Deeney a khel thei lo. Second leg-ah Troy Deeney a khel thei tawh a, Hornets-in 2-1 in hma an hruai a, amaherawhchu injury time-ah Leicester-in penalty an hmu. Anthony Knockaert a rawn pen chhuak a, first leg-a goal awmchhun khungtu hian a pet goal a nih chuan aggregate-ah Foxes an chak dawn.
Knockaert-a'n goal-ah a chantir thei lo a, Watford-in nawr let thutin Troy Deeney-a'n chakna goal a khung ta zawk. Hornets striker Deeney chuan, "Ka kum te a upat hunah he hun hi ka thlir kir ang a, sawi nuam ka la ti dawn chauh. Final-ah Crystal Palace hneh ta lo mah ila fan-te khan football mawina leh nawmna an tem a ni," tiin a sawi.
Deeney a la chuai lo
Kum sarih hnuah pawh Watford tan Troy Deeney a la pawimawh reng. Hornets captain hi a fapain thawk lamah harsatna a neih avangin Covid-19 lakah a fimkhur a, training tir lam a zawm duh lo. Fans lamin Deeney an sawisel a, inelna ṭan hnuah erawh captain hian a ze ngai rawn chhuah chhoin hun pawimawhah a huaisenna a pholang.
Watford hian an match hnuhnung pahnihah point ruk an hmu a, Premier League khel zel turin beiseina a nung thar hle. Match hnuhnung bera Newcastle an hneh ṭumin Deeney hian penalty aṭangin goal hnih a khung a, 2-1 in hnehna an chang.
West Ham lakah pawh Deeney hi en bik tur a ni a, chutihrualin overhead kick hmanga Norwich laka chakna goal khungtu Danny Welbeck pawh sawi hmaih theih a ni lo. Tlarhma lamah Hornets an ziaawm viau a, goal venhim kawngah erawh Nigel Pearson-a hoten insiamṭhat an mamawh thung ang.
Hriatthiam har Hammers
West Ham hi team hriatthiam har tak an ni a, an khelh ṭhat ṭum leh khelh chhiat ṭum a inthlau hle. David Moyes-a hote hian an khelh fuh ṭum chuan Chelsea pawh an hneh thei a, an match hnuhnung berah Norwich City 4-0 zetin an sawp bawk.
Amaherawhchu Hammers hian Burnley an hneh loh bakah Newcastle nen an inhnehtawk tih hriat a ṭha. Chutihrualin match hnuhnung bera Canaries an sawp ṭumin Michail Antonio chuan penalty tel miah loin goal li a khung a, Watford tan ven tham a tling ang.
David Moyes-a hote tana chanchin hriat nuam chu an intawn hnuhnung pahnihah 3-1 leh 4-1 in an sawp a, tun ṭumah hian an mual London Stadium-ah an khel dawn bawk.
Tla thei dinhmuna dingte
15. Brighton & Hove Albion (36 Pts)
Vs Newcastle United
Vs Burnley
16. West Ham United (34 Pts)
Vs Watford
Vs Manchester United
Vs Aston Villa
17. Watford (34 Pts)
Vs West Ham United
Vs Manchester City
Vs Arsenal
18. AFC Bournemouth (31 Pts)
Vs Southampton
Vs Everton
19. Aston Villa (30 Pts)
Vs Everton (Nizan)
Vs Arsenal
Vs West Ham United
Premier League khelh hmabak
Zanin Inkhel Tur
West Ham United 12:30 AM Watford
Gameweek 37
July 18, Inrinni
Norwich City 10:00 PM Burnley
July 19, Pathianni
AFC Bournemouth 6:30 PM Southampton
Tottenham Hotspur 8:30 PM Leicester City
July 20, Thawhṭanni
Brighton & Hove Albion 10:30 PM Newcastle United
Sheffield United 10:30 PM Everton
Wolverhampton Wanderers 12:45 AM Crystal Palace
July 21, Thawhlehni
Watford 10:30 PM Manchester City
Aston Villa 12:45 AM Arsenal
July 22, Nilaini
Manchester United 10:30 PM West Ham United
Liverpool 12:45 AM Chelsea
Gameweek 38
July 26, Pathianni
Arsenal 8:30 PM Watford
Burnley 8:30 PM Brighton & Hove Albion
Chelsea 8:30 PM Wolverhampton Wanderers
Crystal Palace 8:30 PM Tottenham Hotspur
Everton 8:30 PM AFC Bournemouth
Leicester City 8:30 PM Manchester United
Manchester City 8:30 PM Norwich City
Newcastle United 8:30 PM Liverpool
Southampton 8:30 PM Sheffield United
West Ham United 8:30 PM Aston Villa
# Team Pld W D L GF GA GD Pts
15 Brighton & Hove 35 8 12 15 36 52 -16 36
16 West Ham United 35 9 7 19 44 59 -15 34
17 Watford 35 8 10 17 33 54 -21 34
18 AFC Bournemouth 36 8 7 21 37 62 -25 31
19 Aston Villa 35 8 6 21 38 65 -27 30
20 Norwich City 36 5 6 25 26 68 -42 21
Relegation Battle - Thlirna Tawi
• Premier League aṭangin Norwich City an relegate tawh a, tla tur dang pahnih an la awm.
• Table-a 15-na china awm an la him lo. Brighton & Hove Albion dinhmun ṭha tawh viau mah se Newcastle United leh Burnley laka point an hmuh loh ve ve chuan vanduai thei an la ni.
• West Ham United leh Watford ten point 34 ve ve an hmu a, zanin an inkhel tura chak zawk tan Premier League khelh zelna kawng a inhawng zau dawn. Season tawp thlenga an point hmuh zat a inang a nih chuan goal difference en tur a ni a, a la inang cheu a nih chuan an goal khung zat en leh tur a ni.
• AFC Bournemouth-in Manchester City lakah point hmu lo mah se an khelh hmabak Southampton leh Everton te hi khelh chhan tur nei tawh lo an ni a, point ruk an hmu a nih chuan Eddie Howe hote tan beiseina tlem a la awm.
• Aston Villa-in nizan khan Everton an hmachhawn a, an chak a nih ngat chuan Brighton, Hammers, Watford leh Cherries tan rilru hahna tham a tling ang.