Srikanth-a'n world number 1 a hneh

Australia Open Super Series khelh mekah nimin khan Kidambi Srikanth chuan world number 1 Son Wan-Ho a hneh a, B Sai Praneeth pawhin a khingpui hnehin quarterfinal a in vaw kai ve bawk.

Indonesia Open champion hlim Srikanth hian inkhel inhnehtawk takah Son Wan-Ho chu 15-21, 21-13, 21-13 in a hneh. World number 14 Praneeth pawhin 21-15, 18-21, 21-13 in Chinese tlangval Huang Yuxiang a hneh.

India tlangval Srikanth-a'n kar hmasa khan Indonesia Open semifinal-ah Wan-Ho hi a hneh tawh bawk. Tun ṭumah hian an inhnehtawk hle a, game thumnaah erawh Srikanth hian a tir lamah point kua zeta hmahruai fal nghalin dan theih lohin a tlang.

Mipa singles-ah result duhawm India-in a hmuh laiin hmeichhe doubles pair erawh an chak lo. Ashwini Ponappa leh Sikki Reddy te ṭangdun chu 21-18, 18-21, 13-21 in Japan nula Koharu Yonemoto leh Shiho Tanaka te lakah an chak lo a ni.