India U19 an chak lo

Thawhṭanniah India Under 19-in Edmund Lalrindika hattrick chhawr ṭangkaiin Singa­pore U19 chu 7-2 ngawtin sawp mah se Nilainiah erawh thawnthu a danglam ta. Bambolim stadium, Goa-ah ram pahnih hian a vawi hnih nan friendly match an khel a, player 10 nichunga khel India hi 1-0 in an tlawm.

India U19 hian inkhel tawp nan minute 15 chiah hun a awm tawh tihah player pakhat an chan a, penalty an chawi bawk. Mizo rawlthar Lalliansanga chu ṭul lo taka box chhunga a foul avangin a yellow card pahnihna pek a ni a, Singapore-in an hun ṭha neih chhawr loh an duh lo. Mikhual team tan striker Zulkifli chuan penalty hi a pet goal a, goal dang a luh loh avangin hnehna an chang.

Floyd Pinto enkawlna hnuaia khel India U19 hian August-ah 2017 SAFF U-19 Championship an khel dawn a, October aṭang­in 2018 AFC U-19 Cham­pionship quali­fication an khel bawk ang.