Monaco-ah Barca rawlthar

French Ligue 1 cham­pion AS Monaco chuan Barcelona aṭangin rawlthar Jordi Mboula chu kum nga chhung atan an lalut. Leonardo Jardim-a player thar hi kum 18-a upa chauh a ni a, tlarhma lama hman tur niin khelmual sir lama hun hmang chi a ni.

Mboula hian Spain tan kum bithliah inlena hrang hrangah a khel tawh a, nikum khan UEFA Youth League-a Borussia Dortmund an hmachhawn ṭumin halfway line aṭanga ball tlan puiin goal ropui a lo khung tawh.

Mboula chuan, "Bar­celona hian kum kua ka nih lai aṭangin min enkawl a, tun dinhmun ka thlen theih nan hian kawng tingrengin min pui a ni. Tunah chuan ka hringnuna chona thar hmachhawn turin Europe-a club lian berte zinga mi AS Monaco ka zawm," tiin a sawi.