Arsenal lakah champion Liverpool an tlawm

Premier League point hmu hnem ber nih tum Liverpool chu Arsenal lakah 2-1 in an chak lo. Manchester City (100 points) khuma record ropui siam an tumna chu a tawp - hnehna changtu Gunners tan European football beiseina a la nung ve thung.

Sadio Mane goal hmahruai khung Alexandre Lacazette-a'n a sut, tun hnaia khel ṭha striker Lacazette bawkin an goal hnihna luh theih nan Reiss Nelson khung tur a siamsak; Reds goal pahnih hi defender Virgil van Dijk leh goalkeeper Alisson tihsual vanga lut a ni.

Nilaini zan Emirates Stadium-a inkhelah Arsenal chuan ṭan hmain an mikhual Liverpool chu champion an nih avangin zahna chibai (guard of honour) an buk - an zingah hian inkhelh tam duh vanga Gunners chhuahsantu Alex Oxlade-Chamberlain pawh a tel.

Jurgen Klopp-a'n point 100 hmuh tlin a duh zia chu a player thlan aṭangin a chiang. Captain Jordan Henderson aiah Chamberlain a lut tih loh chu an ṭhat dan berin an inrem. Goal nawr tur pawhin a trio chhuanvawr - Mohamed Salah, Mane leh Roberto Firmino te an intlar.

Mikel Arteta-a'n Tottenham an hneh loh ṭuma chesual Sead Kolasinac chu bench-ah dahin Kieran Tierney a pawt hnung a, wingback atan Bukayo Saka a hmang. Inrinni zanah Manchester City nen FA Cup semifinal an khelh zui dawn avangin captain Pierre-Emerick Aubameyang chu bench lamah dah a ni thung.

Inkhel ṭan phat aṭangin Liverpool chuan an ze ngai an chhuah, na takin Arsenal an nawr nghal. Minute 20-naah Andrew Robertson-a cross chu box chhunga vengtu nei lo Mane-a'n awlsam takin a khung. Engzat nge an khung belh ang? tih chu zawhna awm a ni.

Spurs laka tlawm hlim Arsenal an tlawm nawn dawn niin a lang hman. Mahse, minute 32-naah defender man tam Van Dijk-a back pass sual chu Lacazette-a'n keeper Alisson lak khalhin si phurh a sut. Brazil international Alisson ball pek chhuah dik lo chu Lacazette bawkin chang lehin box chhunga awm Reiss Nelson tan a siamsak, kum 20 mi forward hian ball a chan hnuah chiai hauh loin an goal hnihna a khung, goal dang lut zui loin hnehna an chang.

Mikhual Liverpool lamin inkhel an thunun a, ball possession pawh 69% ngawt an nei - goal khung tumin vawi 24 an pet a, chung zinga pariat chu goal zawnah a kal. Arsenal lamin vawi thum chauh petin vawi hnih chu goal-ah a lut thung.

Gunners keeper Emiliano Martinez-a ball pet chhuah tlai chu Firmino-a'n nangching hman mah se goal pawnah a kal hlauh. Argentine keeper hian hnai tak aṭanga Salah-a chip leh tauh luh tur a dansak chu point thum an hmuh theih chhan langsar a ni.

Trent Alexander-Arnold-a'n box pawn aṭanga a ball pet kawh tak mai chu Joe Willock-a'n lo dang pialin goal kilah a lut ngei dawnin lang, mahse 6ft 3in a sang  keeper Martinez chuan mawi taka zuang chungin a lo dansak bawk - hliam vanga chawl lai Bernd Leno tan elpui hautak a tling dawn.

July 15, Nilaini zan

Burnley    1 - 1    Wolves

BUR : Chris Wood 90+6' (P)

WOL : Raul Jimenez 76'

Manchester City    2 - 1    AFC Bournemouth

MAN : David Silva 6'; Gabriel Jesus 39'

BOU : David Brooks 88'

Newcastle United    1 - 3    Tottenham Hotspur

NEW : Matt Ritchie 56'

TOT : Son Heung-min 27'; Harry Kane 60', 90'

Arsenal    2 - 1    Liverpool

ARS : Alexandre Lacazette 32'; Reiss Nelson 44'

LIV : Sadio Mane 20'