Bayern ka zawm hi ka lawm takzet - Sane

Leroy Sane chuan Bundesliga-a vawi 29 zet champion tawh Bayern Munich a zawm theih avanga a lawm thu a sawi. Germany international hian kum nga daih contract a ziak a, Bavarians hian Sane manah hian English club hnenah pound maktaduai 44.7 an pe phawt ang a, a chet ṭhat dan a zirin a man hi pound maktaduai 54.8-ah a pung chho thei ang.

Schalke winger hlui Sane chuan, "Bayern ka zawm hi ka lawm takzet a, training hmasa ber aṭangin nuam ka ti nghal hle," tiin a sawi. Sane hian Bayern zawm tawh mah se German champion tan Champions League-ah a la inlan thei lo a, Manchester City pawhin UCL khelh hmabakah an chhawr dawn tawh lo. Hei hian German winger-in Bavarians zawm a duhzia a sawifiah chiang hle.

Sane hi Bayern Munich nen sawi zawm a ni tawh a, amaherawhchu season bul ṭanna Community Shield-ah a inhliam avangin tun season-ah a inlan meuh lo. Bayern training hmasa berah hian Sane hi Germany international Niklas Sule nen ball an khawih dun. Man City winger hlui Sane-a'n Bayern tana a inlan theih hmasak ber tur chu DFB Pokal a ni dawn a, German Cup hi season thar bul ṭanna tur niin September 11-14 ah khelh a ni dawn a, Bundesliga erawh September 18-ah khelh ṭan a ni ang.