India hmachhawn tur Australia

Commonwealth Games 2022 medal la turin India hmeichhe hockey team tan Australia hneh a pawimawh. Lalremsiami Hmar awmna team hian final an lut a nih chuan a chhe berah silver medal tal an dawng dawn tihna a ni.

India hian zanin dar 10:30 hian Australia an hmachhawn dawn a, inkhel hi Sony Ten 3 leh Sony Six bakah online hmangin Sony LIV hmanga en theih a ni ang. Mizo nulain Commonwealth Games-a hockey semifinal a khel en turin men rei hret a ngai dawn.

An chak lo a nih pawhin India tan bronze medal beiseina a la awm. Semifinal lehlamah England leh New Zealand an inkhel dawn, a chak lo zawk nen pathumna dinhmun an la inchuh leh dawn a ni.

Siami a dam
Nilaini tlai pool match inkhel pawimawhah India hian Canada 3-2 in an hneh, he inkhelah hian India tan Remsiami chuan chakna goal a vaw lut - India hi semifinal a hruai thleng tia sawi theih a ni, inkhelh zawh hmain a khel bawrah hliam a tuar thung.

Kolasib nula Siami chuan, "Inkhelh banah khan vurah ka inchiah (ice bath) a, a hnuah na ka hre zui lutuk lo. Pathian zarah a nat belh a nih loh chuan semifinal ka khelh theih ngei ka beisei," tiin Vanglaini a hrilh, team ṭha Australia a hmachhawn a beiseiawm.

Pool match hmasa lamah Remsiami hian goal a khung lo, player pawimawh leh ṭangkai zinga mi chu a ni ṭhin tho. Zaninah pawh a inlan a nih chuan a chungah mawhphurhna a sang leh dawn, goal khung bakah ball sem kualtu a ni ang.

Australia an ṭha
India-in semifinal an thleng thei a, pool match bikah England (3-1) in an ngam lo tih bak chu khelh chhiat an nei lo. Ghana (5-0), Wales (3-1) leh Canada (3-2) te an hneh thei, final lut tur chuan goal khung ringawt ni loin a venhim lam an uluk a ngai dawn.

Australia hian - Kenya (8-0), South Africa (5-0), New Zealand (1-0) leh Scotland (2-0) te an hneh thei. Pool match vawi li an khelhah goal 16 an khung a, anmahni lamah a lut ve miah lo. Olympic leh FIH World Cup-a an chet ṭhat tawk lohna an insiamṭha tawh hle.

India goalkeeper, captain ni bawk Savita Punia chuan, "Kan hmaa tih tur awm hi a hautak dawn hle, sut tlang tumin theihtawp kan chhuah ang. India tana khel kan ni a, eng pawh hmachhawn ila kan beidawng thiang lo," a ti a, a naute zam lo turin a fuih.