Premier League kan nghak chhuak ta ; A bul ṭantu tur Jesus awmna Arsenal

Football ngainatute tan chuan kar tawpah inkhel hmuhnawm en ho tur a awm leh dawn ta. Ṭhianho titi 'topic' thar pakhat a ni leh dawn a, kar tawp inkhela ṭante club an chak loh chuan WhatspApp group a nuam lo a, Pathianni inkhawm bana inkhel sawiho a phur awm lo leh viau ang.

An chak a nih erawh chuan, ṭhiante ṭawng vena awm lek loin sawi kan inchuh leh ngei ang. Zaninah Premier League 2022-23 season an ṭan dawn; Arsenal ṭantute an mengrei hmasa ber dawn - EPL ngai tawh hrim hrim pawhin an mutsan ngawt dawn lo tih a sawi ngam.

Arsenal hian zanin dar 12:30-ah Crystal Palace an lenchilh dawn. Palace hi Gunners legend Patrick Vieira enkawl an ni a, season hmasa an khelh dan chhut chuan hmachhawn an awlsam lo ang, inkhel hmuhnawm an chhawpchhuah a rinawm.

Jesus awmna
Arsenal technical director Edu-a'n nipui bazarah an thawhrim thu a sawi a, season hmasa khan tun hun chauh ni loin nakin atan team an remkhawm thu a sawi tawh bawk - tun nipui bazar an hman dan chhut chuan Gunners ṭantuten season thar hi an nghakhlel.

Robin van Persie chhuah hnuah Arsenal hian champion pui tham striker an la nei leh lo tia sawi theih a ni. Pierre-Emerick Aubameyang kha theihna nei sang tak ni mah se, club lamin an mamawh ang a phuhruk zo lo - midang chu a tikimtu mai an ni bawk.

Hale End chhuak Eddi Nketiah chu ṭha pangngai tak ni mah se, manager Arteta-a'n rinrawl atan chuan a la nem deuh tih a hria. Manchester City assistant coach a nih laia a hriat chian tawh Gabriel Jesus chu rang takin a la fel nalh, pre-season pawh ṭha takin an hmang hman.

Goal khung harsat Gunners tan Jesus-a'n season thar inbuatsaih laiin goal khung thei a nihzia a lantir a, a takah fiah a ni dawn. Season hmasa goal 11 khungtu Bukayo Saka leh Gabriel Martinelli ten an thlawp dawn - hmatawng hlauhawm tak chu an ni ngei ang.

Number 1 Ramsdale
Bernd Leno a chhuak a, jersey number 1 chu Aaron Ramsdale-a'n a ha nghal dawn. English keeper hian season hmasa khan Leno hi a nek chhuak tawh a, goal venhim kawnga a ṭhat chu thuhran ni se, manger duh dan anga ball a sem chhuah theih vang a ni.

Arteta-a'n keeper leh defender zingah pawh ball sem thei a duh, chuvangin Ramsdale kutah Arsenal hi thui tak a innghat dawn. Defender a lak thar Oleksandr Zinchenko chu zaninah a inlan nghal a rinawm, a elpui tur Kieran Tierney chu hliam vangin a chawl mek.

Tlarhnung ding lam sira khel ṭhin Takehiro Tomiyasu pawh a la inkhel thei dawn lo, he lai hi Wilfred Zaha leh a ṭhiante tan goal nawrna remchang a ni thei dawn. Chuvangin Ben White a tawlh sir tir a nih loh chuan, tawnhriat nei Cedric Soares emaw Hector Bellerin emaw a luh a rinawm.

Gabriel, William Saliba leh White te a khelh rual tir a nih chuan, wing back pahnih a hmang lehin a rinawm. Beiseina sang tak nena an lakluh, an beisei anga an la chhawr si lo Saliba tan league match hmasa lam hi coach leh fans rilru hneh theihna tur hun ṭha a ni ang.

Vieira enkawl Palace
Season hmasa khan Selhurst Park Stadium-ah Arsenal hi 3-0 in an tlawm. Emirates Stadium-ah pawh hun tawp dawna an si phurh sut zoin 2-2 in an inhnehtawk hram - Patrick Vieira enkawl Crystal Palace hi zuam ngawt chi an ni lo.

Palace hian hliam vangin James McArthur leh Michael Olise te an chhawr theih a la beiseiawm loh. Mahse, pre season an match hnuhnunga Montpellier an hneh ṭumin, an hmatawng pathum Jordan Ayew, Wilfried Zaha leh Odsonne Edouard te an inlan vek - Arsenal tlarhnung tan inrin a ngai.

Vieira naute hian Arsenal ang thoin pre-season an hmang ṭha, Liverpool an ngam loh bak chu chak loh an nei lo. Anmahni khelmuala khel tur an ni bawk a, inrintawkna sang tak nen mikhual team lakah point thum hmuh an tum ngam ang.

A bul ṭan ṭhat a pawimawh, a hnuah insiam ṭhat theih ni mah se a tira chetfuh loh chuan club dang chetsual chan tel a ngai tawh ṭhin. Chuvangin Arsenal leh Palace ten an phak tawk china ṭha thei ang berin season bul ṭan an tum dawn a ni.

Zanin Inkhel Tur
Crystal Palace 12:30 AM Arsenal
August 6, Inrinni
Fulham 05:00 PM Liverpool
AFC Bournemouth 07:30 PM Aston Villa
Leeds United 07:30 PM Wolves
Newcastle United 07:30 PM Nottingham Forest
Tottenham Hotspur 07:30 PM Southampton
Everton 10:00 PM Chelsea
August 7, Pathianni
Leicester City 06:30 PM Brentford
Manchester United 06:30 PM Brighton & Hove
West Ham United 09:00 PM Manchester City