Goal 200 khung tlingtu Kane hoin Spurs chak

Tottenham Hotspur thiampuipa Harry Kane chuan Nilaini zan khan Spurs tan Newcastle United 3-1 a an hnehna inkhelah goal hnih a khung a, club level-ah goal 201 a khung tling ta. 

Magpies muala inkhelah Son Heung-min chuan minute 27-na lekah goal hmahruai a khung a, South Korean forward goal khung hi Matt Ritchie chuan minute 56-naah a sut. Mahse, Spurs tan Kane a lo lang, Ritchie goal khung aṭanga minute linaah an goal hnihna a rawn khung a, minute 90-naah a rawn khung belh zui - hun a tawp a, 3-1 in Spurs an chak. European football an beiseina a nung chhunzawm zel. 

Kum 26 mi lek nichungin Kane-a'n club level-ah goal 200-a khung tling der a, ropui tak a ni. English striker hian Spurs bakah Leyton Orient, Millwall, Norwich City leh Leicester City tan loan-in a lo khel tawh. Goal 201-a khung zinga goal 185 zet hi Spurs tana a khung a ni a, heti zat goal khung tur hian match 285 bak a mamawh lo. Club dang pali tan goal 16 a khung a, match 65-a mamawh thung. Goal 201 khung tur hian match 350-a mamawh tihna a ni. 

English striker-in a hming a chher ṭanna tak tak chu 2014-15 season kha a ni a, inelna hrang hrangah match 51 khelin goal 31 a khung. Kane hian he season hnuah hian season khata goal 24 aia tlem khung a la nei lo!

Khawvela striker ṭha ber pawl Mourinho-a'n a nei a, Portuguese manager hian a striker ṭha mi fak turin ṭawngkam ṭha a ui lo. Chelsea boss hlui chuan, "Harry Kane hian a pawimawh zia a inhria a, player thiam chungchuang tak a ni. 

"Hliam avanga hun harsa tak a tawh hnuah minute tin a rawn khel lehnghal a, Magpies laka a inkhel hi ni rei lote chhunga a match lina a ni a, a theihna zawng zawng a hlan a ni," a ti. 

Spurs tan hian a unaupa thah a nih aṭanga ni hnihna lekah Serge Aurier chuan inkhel bul a ṭan a, Mourinho chuan, "Aurier hi mi rilru paukhauh tak a ni. Mi tinin ze hran ṭheuh kan nei a, Aurier khan bul ṭan a duh a ni," tiin a fak. 

Spurs-in hnehna an chang a, Champions League beisei harsa tawh mah se Europa League beiseina erawh a nung zel - table-ah pasarihna an ni a, pangana chinin Europa khel ṭhin mah se cup competition lama team dang result a zirin pasarihna tan Europa khelh beiseina a awm. 

Mourinho chuan, "Champions League kan khel thei lo a nih chuan Europa League pawh a pawimawh tho a ni," a ti a, vawi hnih nomawi a lo chawi tawhna lamah a rilru a pe ṭan. Portuguese boss hian, "Europa League inelnaah vawi hnih ka tel a, vawi hnih ka champion. A vawi thumna pawh a châkawm alawm," tiin a lo sawi tawh a, League Cup (2007-08) nomawi an chawi hnua nomawi lian tham la chawi leh lo Spurs tan chuan Europa League nomawi chawi pawh a châkawm ang.

Kane-a goal khung dan    

Club                    Goals

Tottenham            185

Millwall                9

Leyton Orient        5

Leicester City        2

    

Goal khungna    

Box Chhung        174

Box pawn             27

Ke vei lam            42

Ke ding lam         121

Lu hmang            37

A dang                    1

Penalty                26

Direct free-kick    1