Ronaldo chungah Ten Hag a lawm lo

Manchester United boss Erik ten Hag chuan Old Trafford-a friendly match an khelh ṭuma player ṭhenkhat an haw hma chu a lawm loh thu a sawi a, Dutch coach chuan, "Team kan ni a, chumi awmzia chu a tawp thleng kan awm a ngai tihna a ni," a ti.

Red Devils hian Pathianni khan Rayo Vallecano nen pre-season match an khel a, 1-1 in an inhnehtawk. He inkhelah hian United chhuahsan duhtu Ronaldo a inlan a, mahse, Portuguese forward hi inkhelh zawh hmain Diogo Dalot nen an haw.

Ten Hag chuan, "Inkhelh zawh hmaa hawte chet dan kha pawm dam theih a ni lo," a ti a, Ronaldo hi an chhuahtir lo a nih chuan Red Devils hi an duh loh buainaah an inhamtang reng ang tih hlauhawm tak a ni.

Kum 37 mi Ronaldo hian Champions League khelh a duh avangin United chhuahsan hi a duh a, Real Madrid leh Juventus forward hlui hi hlawhtlin reng duha tuihal a nih miau avangin chhuah a duh hi a awm lo hran lo.

Ronaldo hian chhuah a duh avangin pre-season tour pawh a zawm ve lo a, mimal thil chhuanlamin Thailand leh Australia tour-ah a kal ve lo a, Rayo Vallecano nena an inkhel kha pre-season a United tana a match hmasa ber a ni.

Hetiang boruak karah hian United boss Ten Hag chuan Ronaldo chu an zawrh lai a nih loh thu leh, a chhuah loh tur thu a sawi a, tuna buaina ber chu European top club zingah Ronaldo lakluh duh an awm ang em, tih a ni.

Chelsea nen inbiakna nei hman mah se coach Thomas Tuchel-a'n lakluh a duh lo a, Bayern Munich leh Atletico Madrid-ten Ronaldo lakluh tum anga sawi thawm awm chu an pha bawk.

Manchester City, Liverpool, Paris Saint-Germain leh Barcelona ten Ronaldo khelhnaa khel tur player an nei vek bawk a, Portuguese forward hi chhuak dawn ta se, khawiah nge a kal ang, tih chu hriat a châkawm hle.

United hian August 7, Pathianni zan dar 6:30-ah tun season-a an league match hmasa ber an khel dawn a, City, Liverpool, Chelsea, Tottenham Hotspur leh Arsenal te nena inel tur an nih avangin Ten Hag tan team boruak ṭha lo chinfel vat a ṭul.

Red Devils hian nipui transfer-ah Ducth left back Tyrell Malacia, midfielder Christian Eriksen leh Ajax defender Lisandro Martínez an lalut tawh.