Amateur boxer tan GIG Motors Mizoram Fight Night
Aizawl District Boxing Association leh Zonet Cable TV Pvt. Ltd ṭangkawp chuan nimin khan Zonet Studio-ah Mizorama Amateur Boxing intihsiakna sang ber tur GIG Motors Mizoram Fight Night buatsaih dun turin inremna an siam.
Innremna thuthlungah hian Aizawl District Boxing Association aiawhin president Andrew Lalthlamuana'n a hming a ziak a, Zonet aiawh hian director LV Lalthantluanga'n hming a ziak bawk. Mizoram Fight Night hi November 2022 thlaa neih tum a ni a, R. Dengṭhuama Hall-ah neih a ni ang. GIG Motors chuan boxing inelna lian hi a sponsor dawn a ni.
BFI thuchhuah
Boxing Federation of India chuan April 21, 2022 khan thuchhuah an siam. Boxer, coach, R&J, NTO leh ITO te BFI leh a hnuaia unit-te buatsaih Championships, tournament leh selection trial-ah an tel tur a ni. Heng bakah hian international level-a BFI telna IBA, ASBC leh NSF-ah te an tel thei bawk.
BFI nena inzawmna nei lo pawlin inelna an buatsaih chuan boxer tan buaina a awm ṭhin. Hemi a nih avang hian BFI hnuaia awm State/UT ten inelna an buatsaih dawn a nih chuan a hma lamin BFI an hriattir tur a ni.
Boxer, coach, R/J, NTO leh ITO te BFI buatsaih ni lo inelnaah an tel tur a ni lo. Tel lui an awm a nih erawh chuan BFI leh a hnuaia pawlte buatsaih inelnaah an tel thei lo ang.
MIZBA thuchhuah
July 18, 2022 khan Mizoram Boxing Association (MIZBA) chuan August 31, 2022 aṭanga LPS-in Professional Fight a buatsaih tur chungchangah thuchhuah an siam.
MIZBA chuan, "LPS-in Professional a buatsaih tur hi MIZBA-in a hriatpui loh leh a pawmpui loh a ni tih District Boxing hruaitute leh amateur boxer te kan inhriattir a ni e," an ti.
Mizoram boxing-a thuneitu sang ber MIZBA hian an thuchhuahah hian BFI thuchhuah hi an tarlang a, chutihrualin professional boxer-te chu an duhthlanna an zahsak thu an ziak tel.
MIZBA chuan, "Amateur Boxer, Coach, R/J, NTO leh staff dang reng reng chu professional boxing-a kal duh zawkte an awm a nih chuan MIZBA pawhin an duhthlanna chu zahawm a tiin duhsakna a hlan nghal a ni e," tiin an ziak.
MIZBA hriatpui
Aizawl District Boxing Association leh Zonet buatsaih tur Mizoram Fight Night inelna hi MIZBA-in an hriatpui a, August 6, Inrinni hian MIZBA leh ADBA ten hmalak ho dan tur ngaihtuahin joint meeting an nei ang.
MIZBA president Lalṭanpuia chuan, "ADBA leh Zonet buatsaih tur inlena hi kan hriatpui thlap. MIZBA-in kan theih ang tawkin kan ṭawiawm dawn a, 'full support' kan pe. Organising committee-ah pawh MIZBA leh ADBA ten kan awm ho ang," tiin Vanglaini a hrilh.