Nice-ah Schmeichel a kal!

Leicester City captain Kasper Schmeichel chuan rin loh takin Premier League club a chhuahsan a, kum 35 mi keeper hian French club Nice a zawm.

Kum 35 mi keeper hian kum 2011 khan Leeds United aṭangin Leicester City hi a zawm a, kum 11 zet a khelh hnuah Foxes a chhuahsan - Championship, Premier League, FA Cup leh FA Community Shield-ah champion nomawi a chawi.

Leicester chairman Aiyawatt Srivaddhanaprabha chuan, "Kan hnen a cham chhung, a bik takin captain leh vice captain mawhphurhna a lak laiin Kasper hi club tana ding chhuak tur leh mawhphurhna la turin a inpeih reng ṭhin a, he team hi ṭha takin a kaihruai ṭhin a ni," a ti.

Denmark tana vawi 84 inlan tawh keeper hian King Power Stadium-ah kum khat chhung contract a la nei a, mahse, a duh lam pan tura zalenna pek a nih angin Ligue 1 club a pan a ni.

Leicester neitu Srivad-dhanaprabha chuan, "Khelmual chhung leh pawna midang nun a nghawng dan hian professional, footballer leh mihring pakhat a nihna anga a nun a pho chhuak ṭha hle," tiin a sawi.

Danish Football Player of the Year-a vawi li thlan tawh Schmeichel hian Foxes tan match 479 a khel hman a, club langsar tan khel ngai lo mah se Premier League leh FA Cup nomawi a chawi tawh avangin English football-a a hun hmanah a lawm tawk khawp ang.

Srivaddhanaprabha chuan, "Club tana a hnathawh leh a sulhnu zawng zawng avang hian, Leicester City fan-ten ka zah ang tho hian an zah em em ang tih ka ring a, France-a hlawhtling ngei tura ka duhsak ang ngeiin an duhsak ve ang tih pawh ka ring," a ti.

Schmeichel hian November-ah kum 36 a tling tawh dawn a, hei vang hian Leicester hian a chhuah hi an pawi ti lo niin a lang - Foxes hi European top five league zinga tun nipuia player la lalut lo awmchhun an ni!

Hetihlai hian Swiss coach tawnhriat nei ṭha Lucien Favre enkawl Nice hian nipui transfer-ah player paruk ngawt an lalut tawh a, hming langsar zingah Aaron Ramsey chu free transfer-in an lalut tawh bawk.