Chelsea - neitu thar hnuaiah beiseina thar!
Roman Abramovich-a hun a liam a, Todd Boehly-a hun a inher chhuak - Russian sumdawng hausa Abramovich hnuaia Chelsea leh Boehly hnuaia Chelsea hian inanna pakhat an la nei reng a, chu chu sum an ren lo hi a ni!
London club hian transfer bazar-ah pound maktaduai 100 chuang an seng tawh a, player biak leh dawr lai an la neih reng bawk avangin £200mtd chuang pawh hmang se thil mak a ni lo ang.
Mahse, Abramovich-a hnuaia sum an senin Chelsea an inseng thlawn ngai lo a, khelmualah an duh an hmu ṭhin - champion loh an thiam lo a, nomawi chawi loa season an hman chuan an khua a har tlat zel!
Boehly hnuaia Chelsea sum senin eng chin nge a thlen dawn, tih chu kan la hmuh tur a ni a, Russia-in Ukraine a run avanga club talbuai tak ṭantuten hlimna kawl êng hmuh leh an duh - hmu thei tak ang maw?
No to Ronaldo
Chelsea neitu Boehly-a tihfuh tak pakhat chu transfer thutawpa coach Tuchel a ring hi a ni a, American sumdawng hausa hian Cristiano Ronaldo lei duh mah se mahni inringtawk ve tak Tuchel-a'n a duh lo a, an rim zui lo.
Tuchel hian mual sir aṭanga goal nawr turin Raheem Sterling a lalut a, £47.5mtd man hi Manchester City leh Liverpool tana lo khel tawh a ni a, Premier League-a tlangnel sa a nihna hi Chelsea tan tlarhmaah a ṭangkai ang.
Chutihrual chuan London club hian out-and-out striker tia sawi tur an nei lo a, number 9 ang taka chhawr theih an neih Timo Werner-a'n beisei a phak loh avangin RB Leipzig lamah kir tur anga sawi a awm bawk.
Hetihlai hian Blues hi Pierre-Emerick Aubameyang nen sawizawm an ni a, he thu buatsaih lai hian official taka Barca dawrna la awm lo mahse, player erawh an be ṭan tawh niin an sawi.
Engtin nge?
Chelsea hian Auba hi lei thei ta se, tlarhmaah a mal tlat ang tih chu thil chiang sa a ni a, chuti a nih chuan Kai Havertz leh Sterling ten khelmual sir aṭangin an thlawp thei ang a, London club tlarhma hmachhawn an châkawm lo khawp ang.
Auba hi lut lo ta se, pre-season-a an khelh dan en chuan Havertz emaw Sterling chu 'false 9' anga hman tur an nih a rinawm a, London club hian Christian Pulisic, Hakim Ziyech leh Mason Mount te an la neih miau avangin mual sir aṭanga goal nawr turah chuan thlaphanna tur a awm lo.
Chelsea hian midfield laia khel turin N'Golo Kanté, Jorginho leh Mateo Kovacic an nei sa a, Crystal Palace-a loan hun duhawm tak hmangtu Conor Gallagher pawh hi Tuchel-a'n a duh hle niin an sawi.
Blues hian Barcelona midfielder Frenkie de Jong an beisei mek a, Netherlands international hi Manchester United pawhin duh mah se Champions League khelh a duh avangin Chelsea a duh zawk a rinawm a, Tuchel-a'n midfield-ah duhthlan tur a ngah sawt dawn tihna a ni.
Tuchel-a duhdan
German coach Tuchel-a'n duhdan bik a nei a, a team a khelhtir danah 3-4-1-2 chu a formation hman nasat a ni a, goal nawr pui turin fullback a chhawr nasa - tun thleng chuan a la hlawhtlinpui.
Mahse, full back-ten goal an nawr nasat chuan centre back ṭha an pawimawh a, Chelsea hian chutianga defender rintlak Antonio Rüdiger (Real Madrid) leh Andreas Christensen (Barcelona) chu free transfer-in an chân.
Hetihrual hian European club lian tam takte chil tiputtu Kalidou Koulibaly chuan Napoli aṭangin Chelsea hi a zawm tawh a, Blues legend John Terry-a number hak ṭhin 26 a hak dawn avangin pressure a sang ang.
Senegalese defender dinpui turin Thiago Silva a la awm a, mahse, Azpi lo chhuak ta se, Tuchel hian defender dang a lalut lo bawk a nih chuan kum 23 mi Trevoh Chalobah chunga rinna a nghah mai a ṭul dawn.
Mangṭha Alonso?
Tuchel-a'n 3-4-1-2 formation hmangin, tlarhnungah centre back pathum a dah a, goal nawr pui turin full back pahnih a luhtir ṭhin bawk - he hna hi Reece James leh Marcos Alonso ten an thawk ṭhin.
Mahse, Tuchel-a tana buaina thlen turin Alonso chu chhuak thei dinhmunah a ding a, Spanish defender hian Barcelona pan a duh - Catalan club enkawltu Xavi chuan Alonso leh Azpi te chu lalut tura theihtawp an chhuah thu a hrilh niin an sawi!
Spanish player pahnih tan an ram club ṭha pahnih hi hnar a harsa ang tih a lang chiang a, an hmun ruak luah tur hi Tuchel tan zawn a ṭul dawn a, a thlakna tur a hmu tawh sa niin a lang bawk.
Chelsea hi Brighton & Hove Albion left back Marc Cucurella nen sawizawm mek an ni a, he thuziak i chhiar meuh chuan an inlalut fel tawh hial mai thei - Inter Milan right back Denzel Dumfries pawh Chelsea hian an hmu tai.
Rem chhin ila...
Blues hian Cucurella hi £52.5mtd-a lalut turin Brighton chu inremna an neihpui tawh nia sawi a ni a, Brighton lam hian thudik tawk lo a nih thu a sawi mah se journalist rin tlak Fabrizio Romano-a'n a sawi miau avangin a dik a rinawm.
Leicester City boss Brendan Rodgers-a'n Wesley Fofana chu zawrh lai a nih loh thu sawi mah se Chelsea-in an hnim hnai hle nia sawi a ni bawk a, mahse, Foxes hian £80mtd aia tlawma hralh an tum lo nia sawi a ni.
Chelsea hian an duh ang tak player-te hi lei thei vek ta se, season dang ang thoa rin hlawh Manchester City leh Liverpool tan an hnawk pha viauin a rinawm. Tuchel hian a player duh nei ta vek se 3-4-2-1 a hmang ang a, Édouard Mendy chu si ban nghak a ni ang.
Centre back-ah Koulibaly, Silva leh Fofana inkawpin, full back-ah Cucurella, Reece/Dumfries an awm thei ang a, midfield laiah Kante leh Jorginho awmin, Sterling, Havertz leh Auba ten goal an nawr thei ang - thleng thei tak ang maw?