Aizawl FC-in semifinal an hnaih

I Day Football 2022-ah Aizawl FC chuan nimin khan Chawnpui FC chu 2-1 in an hneh a, I League club hian an match hmasa berah FC Venghnuai an hneh tawh bawk avangin semifinal lut turin an dinhmun a ṭha hle.

Nimin Lammual inkhelah Aizawl FC leh Chawnpui FC te an inkhel tawk a, I League club-in point thum an hlawh chhuak hram. First half-ah Aizawl FC-in K. Lalhmangaihkima leh R. Lalthanmawia te hmangin goal an khung a, second half-ah Laltlanzova hmangin Chawnpui FC-in an sut. Injury time-ah Chawnpui hian penalty hmu mah se tawnhriat nei ṭha striker Samuel Laltlanthanga'n goal-ah a chantir thei lo.

AFC hun
Chawnpui FC coach Lalsangzuala Hmar-in first half inzir nan a hman tur thu a sawi a, inkhel chawhma lamah player nei ṭha zawk Aizawl FC an chungnung. Lalrozama Fanai hoten game ṭha tak an khel a, an phu ang ngeiin goal an khung hmasa bawk.

Minute 15-naah K. Lalhmangaihkima chuan box pawn aṭangin goal kilah a pet a, a sawhna a laih avangin Chawnpui keeper Simon Lalthazuala Hmar-in a dang thei lo. First half tawp hma chiahin Amawia'n freekick aṭangin mawi zetin a khung belh leh bawk.

Chawnpui hun
Coach Sanga Hmar-in second half-ah inkhel thlak danglam turin Lalawmzuala (goalkeeper) leh Lalbuatsaiha te a rawn luhtir a, khelmualah chawlhlawk an hmang ṭha tih a tih theih. Inter Village 2022 final-a man of the match Zozoa'n club thar Chawnpui FC tan minute 54-naah a khung.

Chawnpuiin goal an khung hma avangin inkhelh a nung sawt a, chutihrualin Aizawl FC tan Jeremy Laldinpuia leh Jessy Vanlalmuana ten goal khung belh theihna hun ṭha an hmang ṭangkai thei lo. Sanga Hmar hoten chak theihna remchang an nei a, injury time-ah ball-in HK Lalhruaitluanga kut a per avangin penatly an hmu.

Tawnhriat nei ṭha striker Samuel Laltlanthanga a rawn pen chhuak a, AFC keeper Vanlalhriatpuia'n a dan sak. Hun a tawp zui a, keeper Hriatpuia zarah Aizawl FC-in point thum hlu tak an hlawh chhuak.