Goal nga khung thei Venghnuai

FC Venghnuaiin I Day Football chu Mizoram Premier League atana inpuahchahna atan ringawt hman an tum lo, nomawi chawi ngei an tum tih lantirin nimin khan FC Bethlehem chu 5-1 in an lehthal.

Venghnuai leh Bethlehem te hi an match hmasa berah an chak loh ve ve avangin semifinal beiseina nei turin chak ngei an mamawh. First half-ah Bethlehemin an penalty hmuh hmang ṭangkaiin Moses Lalrinzuala'n minute 37-naah goal hmahruai a khung.

Coach Lalrindika Hmarin second half ṭantirhah ZD Laltlansanga leh T Malsawmzuala a luhtir a, Venghnuai khelh dan a danglam. Venghnuai hian minute 48-naah penalty an hmu a, Lalrammuanpuia (Apuia) siphurh sut nan a hmang.

Bethlehem an insiamṭhat hmain T Malsawmzuala'n minute 53 leh 55-naah a khung belh a, Vanlalthanga'n goal lina khungin minute 88-naah Samuel Lalramchhana'n Venghnuai goal ngana a khung.

Venghnuai hian an match hnuhnung berah Aizawl FC an hmachhawn dawn a, semifinal lut turin chak an mamawh dawn. Chutihrualin Chawnpui leh Bethlehem inkhel a pawimawh. I Day Football-ah head to head en tur a ni a, Chawnpuiin match hmasa berah Venghnuai an hneh avangin an dinhmun a ṭha zawk.