United-in an enkawl dan sawiseltu Henderson

Manchester United goalkeeper Dean Henderson chuan Red Devils-in an enkawl dan chu, "Thil sual a ni," tiin a sawisel a, kum 25 mi keeper hian Nottingham Forest chu season khat chhung loan-a khel turin a zawm.

Henderson chuan season hmasa khan United chuan number 1 a nih tur thu an hrilh niin a sawi a, mahse, hliam vanga Euro 2020 a khelh theih loh bakah, season ṭan dawn khan Covid-19 a kai bawk.

English goalkeeper chuan, "Dik taka sawi chuan, ka career-a thla 12 hrehawm ber a ni. United-ah number 1 ka ni dawn emaw tiin, loan-a khel tura sawmna tam tak nipui lai khan ka hnar a, ka chhuah an phal lo bawk. A hrehawm duh hle a ni," a ti a, United chu thutiama rinawm loah a puh.

United boss kal chhuak ta Ole Gunnar Solskjaer chuan 2020-21 season tawp lamah khan Henderson hi number 1-ah a hmang a, David de Gea aiin a ring zawk - mahse, Europa League final-a Villarreal an hmachhawnna inkhelah erawh a inlan lo.

Mahse, Henderson hian beiseina sang tak a neih laiin Solskjaer leh Ralf Rangnick ten a chungah rinna an nghat ngam lo a, season hman zawh takah khan inelna hrang hrangah match thum chauh a khel!

Henderson chuan, "Euro squad aṭanga ka kir khan, "He hmunah hian number 1 i ni dawn," tiin min hrilh a, Covid-19 ka kai hnuah khelmualah ka kir leh a, number 1 ni zui leh mai tura ka inngaih laiin a tira min tiam kha an bawhzui tawh lo.

"Ka kum ang zatah chuan, thla 12 zet ṭhut mai mai kha chu ka chungah thilsual lian tak an ti ang mai a ni. Ka thin a rim a, club thuneitute hnenah inkhelh ka mamawh thu leh min chhuahtir tura ngenna ka thlen a, manager thar Erik ten Hag rawn kal hmain ka chhuak hman ṭhelh hial a ni - a hnuah kan inbe leh tawh lo," a ti.

England tana vawi khat goal veng tawh keeper chuan, "Khelmual chhung leh pawnah hmasawn turin ni tin ka bei reng a, Nottingham Forest nena season kan hman tur hi nghakhlel takin ka thlir a ni," a ti - Forest hian August 6 zan, dar 7:30-ah Newcastle United lenchilhin season bul an ṭan ang.