Washington-ah beisei loh result thleng zel

US Open inbuatsaihna zinga mi Washington Open-ah beisei loh result kan hmu nasa. Seeded pakhatna leh champion lai ni bawk Jessica Pegula chu Daria Saville lakah a tlawm a, player ṭha Simona Halep leh Hubert Hurkacz te an chak lo bawk.

Australian nula Saville hi tun dinhmunah world number 88 a ni a, khaw lum leh boruak hnawng tak hnuaia inkhelah Pegula hi 7-5, 6-4 in a hneh. Inkhel dangah seeded pathumna Halep chu Anna Kalinskaya nen an inkhel, 7-5, 2-0 a nih laiin a inkhel chhunzawm thei tawh lo.

Saville chuan, "Boruak a lumin inkhelh a awlsam lo. A nihna takah chuan inkhel awlsam a ni lo, point khat lek hmuh belh pawh kha a harsa thei hle. Tharum hman hnem a ngai a, a tawpah ka vannei ta hram," tiin a sawi.

Inkhel dangah seeded pahnihna Hurkacz chu second round-ah a tla ve bawk. Polish nula hi Finland player Emil Ruusuvouri lakah 6-4, 7-6 in a chak lo zawkah a ṭang a, player langsar leh rinkai an tla nasa hle.