Mizoram Lockdown (inkharkhip) Ni 117

Season tawp ruala Manchester City chhuahsan tur David Silva-a'n World Cup 2018 zawh khan Spain tana inkhelh a chawlhsan thu a puang a, ram tan hian match 125 khelin goal 35-a khungsak hman. 

Silva-a'n ram tana goal a khung hnuhnun ber chu November 11, 2017 kha a ni a, friendly match-a 5-0 a Costa Rica an sawp ṭumin goal hnih a khung - Spain tana goal a khung hnuhnun berna hi ram tana match 117-a khelhna a ni. 

Valencia aṭanga khawvel hriat hlawh player hian Spain tan World Cup 2010-ah nomawi a chawi a, Euro 2008 leh 2012-ah khan a champion pui bawk. Euro 2012-a an champion ṭum hian Team of the Tournament-ah a lang bawk. 

Silva hi Valencia academy aṭanga inzirchhuak niin 2003-04 season khan B team tan a khel a, Eibar (2004-05) leh Celta Vigo (2005-06) a pan hnuah kum 2006 khan Valencia-ah hian a kir - Copa del Rey nomawi a chawipui. 

Valencia tan inelna hrang hrangah match 168 khelha goal 31 a khung hnuah kum 2010 khan Manchester City a pan a, PFA Team of the Year-ah vawi hnih langin Premier League-ah vawi li a champion. City tan hian FA Cup (2), League Cup (5) leh FA Community Shield (3) nomawi a chawi a, tun season-ah FA Cup pakhat dang chawi belh leh a beisei ang.