Hammers-in Onana lalut dawn

West Ham chuan Lille midfielder Amadou Onana an lalut dawn a, French club nen hian pound maktaduai 33.5-in inremna an nei - he thu buatsaih lai hian mimal thilah inremna an la nei lo.

Kum 20 mi Onana hian season hmasa lawk khan Lille hi kum nga chhung atan a zawm a, mahse, season khat chauh a khel hman tihin Premier League lamah chona hmachhawn turin a pem zui.

Onana hian Belgium tan age level hrang hrangah a lo khel tawh a, nikum June khan senior team tan a match hmasa ber a khel a, hmabak a nei êng hle.

6ft 5in zeta sang midfielder hi Belgian club Anderlecht, RWS Bruxelles leh Zulte Waregem academy-ah te a inzir a, Hoffenheim academy-ah season thum zet a inzir bawk.

German second division club Hamburger SV-ah a professional zinkawng zawh ṭanin, season khat chauh a khelh hnuah season hmasa khan Lille a zawm a, French club tan match 41 khel nghalin, goal thum a khung a, assist vawi khat a nei bawk.

Season khat chauh a khelh hnuah Hammers a pan leh ta a, kum 20 mi midfielder hi Premier League-ah en bik a sual lo mai thei.

Hammers hian Burnley playmaker Maxwel Cornet an rim mek bawk a, kum 25 mi hian season hmasa khan Clarets tan match 26-ah goal kua a khung.

David Moyes-a enkawl team hian goalkeeper Alphonse Areola, midfielder Flynn Downes, defender Nayef Aguerd leh forward Gianluca Scamacca an lalut tawh a, Onana hi an player lakluh pangana tur a ni.