Ṭhingṭhit an ti tlem dawn

Premier League inkhel ṭan hmain player leh coaching staff-te an ṭhingṭhi ṭhin, hei hi chi leh chi inthliarna tihbo an duh vang a ni a, a nihna takah chuan midum hmuhsitna reh se an tih vang leh inpumkhatna lantirna a ni.

Kum 2020 May thla khan United States-ah George Floyd chu police kut tuarin a thi, hei thil thleng avang hian Black Lives Matter movement a chhuak. Hemi nghawng zel chu inkhelh dawna player an ṭhingṭhi ṭhin pawh hi a ni zel.

Inkhelh dawna ṭhingṭhit hi a ṭul ti lem lo tu an awm ta nual a, chung zingah chuan mihang ngei pawh an ni. Crystal Palace forward Wilfried Zaha chu ṭhingṭhi lo langsar hmasa zingah a tel.

EPL captain ho an inhmukhawm a, match tina ṭhingṭhit hi a ngai an ti ta lo. Mahse, tun season Premier League bul ṭanna leh a tawpnaah erawh an la ṭhingṭhi dawn a, match ṭhenkhatah an la ṭhingṭhi bawk ang.

Ruahman dan chuan - October leh nakkum March thla hian, chi inthliarna in infiamna huangah hmun a chang lo tih an lantir leh ang. Heng bakah hian Boxing Day (December 26), FA Cup final leh League Cup-ah te erawh an la ṭhingṭhi dawn a ni.