Season bul ṭan lo tur Calvert-Lewin

Everton striker Dominic Calvert-Lewin chu training an neih laiin a inhliam a, a chawlh chen tur tak hriat la ni lo mah se Premier League an khelh hmasak bera Chelsea an hmachhawn hunah a inlan thei dawn lo.

England international hian season hmasa pawh khan hliam a tuar tawh, thla li chhung inkhel thei loin a lo awm tawh a ni. Richarlison-a'n Tottenham a pan san tawh bawk si a, manager Frank Lampard tan tlarhma lamah duhthlan tur an tlem dawn.

Toffees manager Lampard chuan, "Hun rei tak chhung a chawlh a ngaih loh hram kan beisei. Inrinni zana Chelsea kan tum hunah erawh a inlan thei dawn lo tih a chiang tawh.

A taksa a hriselin a rilru pawh a inpeih viau, chutihrualin training laia hliam neih hi chu infiamnain a ken tel zinga mi a ni. Tunah chuan duhthlan tur dang kan nei lo, chuvangin Dominic tel loa khelh dan kan zir phawt a ngai," a ti.

Tun dinhmunah Lampard tan Solomon Rondon, Demarai Gray, Alex Iwobi leh Anthony Gordon te chu tlarhma lama duhthlan tur an ni ang.