Messi-a'n season ṭha tak hman beisei

Lionel Messi-a'n season hmasa khan Ligue 1-ah goal nga chauh a khung a, tun hnai season 10 chhung chhut kirin goal a khung tlem ber ṭum a ni a - Barcelona captain hlui hian match 26 a khelh tho avangin a record hi a ṭha lo hle.

Goal khung tam lo mah se, a ṭhiante khung tur erawh vawi 14 chu a nei tho. Mahse, khawvela player ṭha bik tan hei hi inhnemna a tling zo lo. Paris Saint-Germain lamin an lakluh chhan ang pawh a ni lo ngei ang.

Kum 35 mi Messi chuan, "Engmah sawi lawk theih a ni lo, theihtawp erawh ka chhuah ang. Kum tawpah World Cup kan khel dawn, chuvangin a ṭha thei ang berin club tana kan khelh hmasak a ngai," tiin a sawi.

Pre season an hmanna lamah chuan Messi hi Neymar leh Kylian Mbappe te nen an inkawprem hle. PSG neitu lamin Ligue 1 chauh ni loin, an duh ber Champions League nomawi an beiseina pawh a sang zual ngei ang.

PSG coach Christophe Galtier chuan, "Messi hi ṭangkai lehzual zawka hman kan tum dawn. Season hmasa lama a khelh dan kan thlir chuan, amah aṭanga ball chhuak leh ama tana khelh dan kalphung thlak a tam lo.

"Tunah erawh a hma aiin a ṭhiante nen an inkawm nel tawh a, a hma zawng aiin a chungah mawhphurhna a sang zual dawn. A theihna ang taka khel chhuak turin puih kan tum dawn a ni," tiin Barcelona captain ang tak kha chhawpchhuah leh ngei a tum.

Messi hian Argentina tan Copa America nomawi a chawi tawh a, a duhthusam ti famkim turin World Cup chawi leh ngei a tum. South American ram hian team nghet tak an din tawh a, Qatar World Cup khel turin an inpeih tawh.

World Cup khelh hmain season chanve deuhthaw an hman a la ngai, club lama che ṭha lo tan ram tan ṭha taka khelh thut a harsa ṭhin. Chuvangin Argentina captain hian club hlawhtlinpui a duhna thinlung bakah, ram aiawh tura inbuatsaih nan season hman ṭhat a tum khawp ang.

French Ligue 1 hi tun kar tawpah an ṭan tawh dawn. Champion lai Paris Saint German hian Inrinni zan dar 12:30-ah Clermont Foot an lenchilh dawn a, manager thar kaihhruaina hnuaiah point thum hmuh nghal an tum ang.