Ramhlun South an champion
Mizoram chhunga veng-khua football hmanga inelna ngaih hlut ber TṬ Royte Trophy 2017 champion chu Ramhlun South an ni.
Nimin Lammuala Inter Branch YMA Football Tournament final khelhah Ramhlun South tan Lalawmpuia'n goal awmchhun a khung a, Chanmari 1-0 in an hneh. CYMA Football 2008-ah coach HC Zarzoliana'n a captain-na hnuaiah Ramhlun South hi a champion pui tawh a, kum kua hnuah Zara'n a enkawlna hnuaiah an veng nomawi a chawi pui leh bawk.
CYMA Football-ah hian top scorer hi Last 16 aṭanga chhiar ṭan a ni a, Chaltlang tana goal li khungtu PC Lalhriatpuia chu top scorer a ni a. Ramhlun South champion puitu defender Zohmingliana Ralte chu best player a thlan a ni.
Mipui an pui
Chanmari mipuiin an intiam lawk ang ngeiin kawr var nen Lammual an pan a, Zomuanthanga Stand leh Zohminga Zote Stand a var ṭha hle. Ramhlun South football team pawh inchhuan pui tham mipuiin an ṭawiawm a, S. Malsawmtluanga Stand leh K. Kawla Stand a sen phei vek.
Inkhelh ṭan hma hauhin mipui vangin final boruak a nung nghal a, inkhel hmuhnawmin a chhunzawm nghal bawk.
Danglamna goal 1
Chanmariin an defender pawimawh Lalmuanawma leh Lalhriatrenga te tel lo chungin inkhel nung tak an khel nghal a, amaherawhchu Ramhlun South-in goal chance an nei hmasa a, minute hnihna lekah box pawn aṭanga Lalnunmawia ball pet chu Chanmari keeper MS Dawngliana'n a nam chhuak ṭha hle.
Chanmariin inkhel thunun hret mah se goal hmaah Ramhlun South an hlauhawm zawk a, Mawitea chu Chanmari tlarhnung tan a hnawk sak a. Chakna goal khungtu erawh DSK Shivajians forward Lalawmpuia niin Ramhlun South tlangval hian minute 40-naah a theihna pholangin goal awmchhun a khung.
Second half-ah goal chance a tam lo a, Ramhlun South winger Vanlalthlamuana ball pet chu Chanmari defender Lalrinchhana a per hnuah goal ban per lehin keeper MS-a zawnah a kal hlauh. Chanmariin C. Muana leh Achia tel lo an tuar a, best player atana thlan Zotea kaihhruaina hnuaiah Ramhlun South tlarhnung a phui ṭhat bawk avangin final-ah goal khat bak a lut lo.
Zara a lawm
Ramhlun South coach HC Zarzoliana chuan, "Goal khat kan khung theih avangin ka lawm a, kan vannei ka ti. Chanmari aia kan chungnungna a awm bik lo a, an player pawimawh an khel thei lo kha an tuar a ni. Kan champion hi ka lawm a, captain leh coach nichunga CYMA Football-a kan veng ka champion pui thei hi ka tan chuan a hlu a ni," tiin Vanglaini a hrilh.
Veng mipui ṭawiawmna chungchang sawiin Zara chuan, "Veng mipui Ṭawngṭaina rah a ni a, sum leh pai bakah hun leh tha an sen avangin an chungah ka lawm takzet. Kan champion theih chhan hi kan vai thawhrah a ni," tiin nomawi chawi tura an ṭanrual thu a sawi.