Liverpool player thar Salah

Mohamed Salah chu Liverpool player a ni ta. Kum 25-a upa winger hi Reds chuan AS Roma aṭangin pound maktaduai 34-in an lalut a, Anfield-ah kum nga chhung khel turin contract a ziak.

Chelsea winger hlui hi indawrna neih a nih laiin Reds player zinga manto ber tur anga ngaih ni hman mah se kum 2011-a Merseyside club-in Andy Carroll lakluh nana pound maktaduai 35 an hman erawh a khum ta lo a, season hmasa ṭan dawna Reds zawmtu Sadio Mane nen an man a inzat thung. Player pahnih hi African player zinga manto ber an ni.

Liverpool boss Jurgen Klopp chuan, "Salah hian tawnhriat leh theihna sang tak a nei kawp a, kan lalut thei hi keini tan chuan a lawmawm takzet a ni. Basel player a nih lai aṭang tawh khan Salah hi ka hria a, tunah chuan player puitling tak a ni tawh a ni," a ti.

German coach chuan sawi chhunzawmin, "Player tlan chak tak a ni a, kan ṭhat tawh sa na tlarhma lamah kan ṭhatna a belhchhah dawn a ni. Tun hma zawng aia tlarhmaa inelna a nasa lehzual tur hian minti lawm hle," tiin a sawi.

Anfield-a kar khata £90,000 hlawh tur winger chuan, "He hmun ka lo pan thei hi ka lawm takzet. Ka theihna zawng zawng he club tan hian ka pe dawn a, nomawi chawi ngei ka duh a ni. Chelsea ka awm lai ai khan tunah chuan ka puitling tawh zawk a, tawnhriat ka ngah tawh hle," a ti a, kum 2014-a Chelsea tan a khelh lai aia ṭha tawh zawkah a inngai.

Kum 25-a upa Salah hian Reds tan Roberto Firmino hak ṭhin jersey number 11 a ha dawn a, Brazilian forward hian season thar aṭang chuan 9 a ha tawh thung ang.

Egypt international hian season hmasa khan Roma tan inelna hrang hrangah match 41 khelin goal 19 a khung sak a, assist 12 a nei bawk. Stamford Bridge-ah beisei a phak loh hnuin February 2015-ah khan Fiorentina chu loan-in a zawm a, nipuiah Roma-ah loan bawkin a kal.

Roma-a a season hmasa berah hian goal 15 a khung sak nghal avangin season hmasa ṭan dawn khan Italian club hian pound maktaduai 15-in an lalut a, tunah erawh pound maktaduai 34-in an hralh chhuak leh ta.

Liverpool hian Salah an lakluh hma hian Chelsea rawlthar duhawm Dominic Solanke chu an lo lalut tawh a, kum 19-a upa striker hian U20 World Cup khelh zawh takah khan England champion puiin Best Player-ah thlan a ni.