Chile tana goal khung tam ber Sanchez Germany 1 - 1 Chile
FIFA Confederations Cup-ah Alexis Sanchez-a'n Chile tana inkhel bul a ṭan hmasak berah goal a khung nghal a, Arsenal forward hian ram tan goal 38 khungin Chile tana goal khung tam ber a ni.
Ningani zan inkhelah Cameroon leh Australia te St Petersburg-ah 1-1 in an inhnehtawk a, hetiang zat bawk hian Chile leh Germany te Kazan-ah an inhnehtawk bawk. Group B-ah Chile leh Germany ten point li ve ve an hmu tawh a, Australia leh Cameroon ten point khat ve ve an hmu tawh bawk.
Aussie tan point 1
Australia-in Confederations Cup-ah a zawnin match li an chak tawh lo a, record duhawm loh nuai bo nan Cameroon laka goal an chhuah hnuah point khat an hlawh chhuak.
Saint Petersburg-ah Cameroon-in inkhel bul ṭan ṭha tawk lo mah se first half tawp hma chiahin Andre-Frank Zambo Anguissa-a'n keeper Maty Ryan pet khumin goal khatin hma an hruai. Cameroon-in second half-ah Vincent Aboubakar hmangin goal hnih khung theihna hun ṭha an nei a, an chance ṭha neih an tuar.
Inkhelh ṭan aṭanga darkar khatnaah Socceroos captain Mark Milligan-a'n penalty aṭangin an siphurh a sut a, goal dang a luh belh tawh lo.
Germany an tlo
Germany coach Joachim Low-a'n Confederations Cup khel turin naupang rual leh kum upaah pawh tawnhriat nei tam lo a ko a, chutichung chuan Copa America champion Chile an chelh thei.
Ṭan phat aṭangin team ṭha zawka ngaih Chile inkhel a nung nghal a, Gunners forward Sanchez a langsar nghal. Minute rukna lekah Alexis hian club tana a khelh pui Shkodran Mustafi tihsual hmang ṭangkaiin Chile goal khatna a khung. He goal hi Confederations Cup-a goal 400-na chiah a nih bakah Chile tana goal khung tam ber nihna hauh turin Marcelo Salas aiin goal khatin a khung tam chiah bawk.
Chile forward Eduardo Vargas-a'n keeper Bernd Leno aia lut Barcelona keeper Marc-Andre Ter Stegen dan hman loin pet mah se crossbar a per hnuah goal pawnah a sawt chhuak a, Germany an him hlauh. Hemi hnu hian Germany an insiamṭha a, minute 41-naah Emre Can pass chu vei lama awm Jonas Hector chuan box chhungah cross lut lehin Lars Stindl-a'n sihphurh sut nan a khung. Kum 28 mi Borussia Monchengladbach captain Stindl hian ram tan vawi li chiah a la khel a, Australia an hneh ṭumin goal hma hruai a khung tawh bawk.
Second half-ah Chile-in Germany nawr tum viau mah se an game an hloh a, Sanchez-a freekick tih loh chu goal hlauhawm an nei tawh lo a, goal dang a luh belh lo.
Engtin zel?
Group B aṭangin semifinal lut chiang an la awm lo a, Pathianni zan dar 8:30 hian group match hnuhnung ber khelh a ni dawn. Point li hmu leh point khat hmu an inkhel dawn a, head to head en tur a nih avangin Australia leh Cameroon tan pawh beisei tur a la awm.
Germany-in Cameroon lakah point khat hmuh bak an mamawh tawh lo a, amaherawhchu hun tawp thlenga an inhnehtawk a nih chuan tawnhriat ngah an tam loh avangin talbuai thei an ni. Die Mannschaft tan captain Julian Draxler chu player pawimawh a ni a, match hniha goal an chhuah ve ve avangin tlarhnung an siam ṭhat a ṭul ang.
Group B-a team ṭha bera ngaih Chile-in Australia lakah fiahna an hmachhawn dawn a, Asia khawmualpui aiawh hi zuam chi erawh an ni lo ang.
Group B - Results, Fixtures, Table
June 18, Pathianni
Cameroon 0 - 2 Chile
CHI : Arturo Vidal 81'; Eduardo Vargas 90+1'
June 19, Thawhṭanni
Australia 2 - 3 Germany
AUS : Tom Rogic 41'; Tomi Juric 56'
GER : Lars Stindl 5'; Julian Draxler 44'(P); Leon Goretzka 48'
June 22, Ningani
Cameroon 1 -1 Australia
CAM : Andre Anguissa 45'
AUS : Mark Milligan 60' (P)
Germany 1 - 1 Chile
GER : Lars Stindl 41'
CHI : Alexis Sanchez 6'
June 25, Pathianni
Germany 8:30 PM Cameroon
Chile 8:30 PM Australia
# Team Pld W D L GF GA GD Pts
1 Chile 2 1 1 0 3 1 2 4
2 Germany 2 1 1 0 4 3 1 4
3 Australia 2 0 1 1 3 4 -1 1
4 Cameroon 2 0 1 1 1 3 -2 1