Federer dinhmun a ṭha zel

Grand Slam vawi 18 champion tawh Roger Federer-a'n Wimbledon atan inbuatsaihna ṭha a nei zel. Swiss star hian Ningani zan khan khawtual tlangval Mischa Zverev chu 7-6 (7-4), 6-4 a hnehin Halle Open quarterfinal a inhlangkai.

Kum 35-a upa Federer-a'n last 16 a paltlang theih avang hian July 3 aṭanga khelh tur Wimbledon-ah seeded palina aia hniam a ni dawn lo tih a chiang a, hetiang a nih chuan semifinal hma chuan Andy Murray, Novak Djokovic leh Rafael Nadal te a hmachhawn dawn lo tihna a ni.

Federer hian Halle Open-ah hian match 61 a khelh tlinna chiah a ni a, vawi ruk chiah chak loh a la nei. Zverev nen bik hian vawi li an intawnna niin hengah hian Federer-a'n hnehna a chang vek. Semifinal lut tur chuan Florian Mayer a paltlang leh a ngai ang.

Inkhel dangah world number 9 Kei Nishikori erawh a hnungzâng na avangin Karen Khachanov a hmachhawn tluan thei lo. Japan tlangval hian a tir lam aṭangin harsatna a nei nghal a, medical time out a neih hnu pawhin beisei angin a ṭha thei lo, set hmasa berah 3-2 a a hnufual laiin a khel zui thei lo a ni.

Nishikori hi Halle-ah hian a vanduai thei hle, tun ṭum hi a zawna vawi thum a inhnuhdawhna chiah a ni. Khachanov hian quarterfinal-ah Mikhail Youzhny hnehtu Andrey Rublev a hmachhawn leh ang.