Confederations Cup Russia tan chak a ṭul
Zanin dar 8:30-ah Russia leh Mexico ten Confederations Cup group stage-a an match hnuhnung ber an khel dawn a, inelna thlengtu Russia tan semifinal lut turin hnehna chan ngei ngei a ṭul - Mexico tan draw a tawk thung.
Portugal leh New Zealand chu zan dar 8:30-ah tho an inkhel dawn a, All Whites (New Zealand sawina) hi beisei tur nei tawh lo an nih laiin Portugal erawhin an ke lehlamin semifinal an rap tawhah ngaih a ni - a thiam pali zinga tel turin point khat hmuh a tawk.
Russia beiseina
Inelna thlengtu Russia-in an match hmasa berah New Zealand hneh nghal mah se Ronaldo vangin an match hnihnaah Portugal an ngam lo a, semifinal lut turin Mexico laka chak an mamawh. Stanislav Cherchesov-a naute hian hnehna chang zo lo pawh ni se semifinal luh dan kawng an la nei tho a, chu chu New Zealand-in Portugal an hnehin a ni - midang kuta innghah ai chuan Mexico lakah chak tumin an khel ang.
Mexico-in hliam vangin defender pahnih Carlos Salcedo leh Hector Moreno an chhawr thei dawn lo a, Russia tan thu hriat nuam a ni. Mahse, Mexico boss Juan Carlos Osorio-a'n New Zealand nen an inkhelh ṭumin a player chhuanvawr Javier Hernandez chu a hahdamtir a, Manchester United striker hlui hian Russia a hmachhawn tawh beisei a ni - ven uluk a fin thlak ang.
Russia tan final?
Kum 2001 khan South Korea-in Confederations Cup an thleng a, group stage pawh an paltlang zo lo. Russia hi zaninah an tlawm a nih chuan South Korea hnua Confederations Cup-a inelna thlengtuin group stage an paltlang loh hmasak ber a ni dawn tihna a ni - 2018 World Cup thleng tur tan mualphona a ni ang.
Russia boss Stanislav Cherchesov pawhin hei hi a hai lo. Kum 53-a upa manager chuan, "Mexico nena kan inkhel tur hi ram pahnih tan chuan final tur ang mai a ni," a ti a, an khingpui tur Mexico laka pressure pek loh bik a duh lo.
En bik tur
Mexico tan ṭum dang ang bawkin Javier Hernandez chu en bik a ni leh dawn. Kum 29-a upa striker hian ram tan match 93-a khelhah goal 48 khungin Mexico tana goal khung hnem ber dinhmun a luah tawh a, a record-a goal 'belh' zel a pawiti lo tawp ang! Kum 26-a upa Raul Jimenez lam hmaih theih a ni lo. Benfica forward hian ram tan a match hnuhnung pangaah goal thum a khung a, Chicharito nena an inkawp hi Russia tlarhnung tan dan a hautak dawn.
CONCACAF champion-in an tlarhma an chhuang a nih chuan Russia-in si ban nghak turin Igor Akinfeev an nei. Russian legend hian club-ah CSKA Moscow tan bak la khel lo mah se Europe-a goalkeeper ṭha zingah a hming lam hmaih a ni ngai lo a, Mexico tlarhma dang chat turin a ṭha tawk. Russia tan tlarhmaah Russian Premier League season hnuhnung pahniha top scorer Fyodor Smolov bawk hi innghahna tur a ni.
Ronaldo tel loin
Portugal-in point khat an mamawh a, an match hnuhnung bera an tum tur lah 'team nem' nia ngaih New Zealand an ni. Inelna neih ṭan a nih hma hauh khan Portugal boss Fernando Santos-a'n player a siksawi ṭhin tur thu a sawi a, mah se an match hmasa bera Mexico an inhnehtawkpui avangin Russia lakah an inthlak danglam ngam lo.
Europe champion hian zaninah erawh squad nem zawkin New Zealand an hmachhawn a rinawm a, Fernando Santos-a'n captain Cristiano Ronaldo chu bench-ah a dah rin a ni - Portugal tan semifinal thlir lawk hi a fin thlak.
Group A
Zanin Inkhel Tur
New Zealand 8:30 PM Portugal
Mexico 8:30 PM Russia
Team Dinhmun
Team Pld W D L GF GA GD Pts
Mexico 2 1 1 0 4 3 1 4
Portugal 2 1 1 0 3 2 1 4
Russia 2 1 0 1 2 1 1 3
New Zealand 2 0 0 2 1 4 -3 0