India sum hmuh tur a tam dawn
Khawvela cricket thuneitu sang ber International Cricket Council chuan an sum hmuhte kum 2016-2023 inkara sem chhuah dan tur an puang a, India pawisa dawn tur a tam fal hle - ICC Champions Trophy final-a chak lo hlim India hian kum sarih chhung hian pound maktaduai 319 zet ICC aṭang hian an dawng dawn a, India hnaih bertu England dawn tur zat chu pound maktaduai 110 a ni.
India rama cricket enkawltu Board of Control for Cricket in India (BCCI) chu ICC nen hian sum sem dan tur chungchangah an lo inhmuthiam lo tawh a, April khan ICC chuan India hi pound maktaduai 227 dawng turin an ti. ICC-in sum an hmuh tamna ber BCCI hian heti zat lek dawn hi an duh lo a, Champions Trophy khelh lohah ICC an lo vau tawh.
Inremna chu
ICC sum sem dana lungawi lo India-in Champions Trophy khelh an tum loh thu an sawi a, squad thehluh theih ni hnuhnung ber thlengin India squad pawh an puang lo. Mahse, Supreme Court meuh a inrawlh hnuah India-in an squad an puang a, Champions Trophy-ah inlanin final an thleng hial.
Champions Trophy an khel zo a, ICC-in an hnuaia ram hrang hrang test khel pha chinte pawisa dawn tur an puang. Rin lawk ang ngeiin India pawisa dawn tur tihpun a ni a, South Africa, Sri Lanka, Pakistan, Bangladesh, New Zealand leh West Indies te chu pound maktaduai 101 ṭheuh dawng tura tih niin Zimbabwe chuan pound maktaduai 74 an dawng dawn thung.
Ningania test khel thei tura pawm hlim Ireland leh Afghanistan pawh an hausak belh nghal dawn a, pound maktaduai 189 an insem ang.
India buaina?
Engvangin nge India-in a tira sum an dawn tur zat an dawn duh loh? tih chu zawhna awm thei a ni a, India-in a chhanna chu, "ICC sum hmuh 70% hi keimahni thawhchhuah a ni a, a sum sem aṭanga 70% hi engvangin nge kan chan loh ang?" tih hi a ni.
Mahse, India ngaihdan hi ICC lam ngaihdan a ni ve lo a, sum chu in ang khat veka sem an duh. Hei tak hi thawhhnem fal nia inngai India tan pawm dam a harsa a, Champions Trophy hial khelh loh an tum tak ut utah chuan ICC-in India hlutzia hriain an thutlukna hmasa an sut.
Hetihrual hian India-in pawisa a dawn tur zat pound maktaduai 319 hi a tira an beisei pound maktaduai 470 chuang nen chuan a la inthlau ta viau tho a, a hlawkna teltu ber erawh full member nihna nei thar Ireland leh Afghanistan an ni.