Djokovic hnung zui tur Halep

Hmeichhe tennis world number 2 Simona Halep chuan karleh chhunga khelh tur Eastbourne Open-ah a tel tur thu a ti­chiang. Halep hma hian mipa world number 4 Novak Djokovic chuan grass court inelnaah hian a inlan tur thu a lo tichiang tawh bawk.

Romanian star Halep hian clay court season duhawm takin a hmang a, Madrid Open nomawi a chawi hnuah French Open final lut mah se Paris-ah hi chuan a chak lo thung, Roland Gar­ross-a a hlawhtlin loh hnuah a ke rek a hliam zui a, a hliam vang hian Aegon Classic-ah pawh a inlan thei lo.

Kum 25-a upa Halep hian Grand Slam nomawi a la chawi lo a, July 3 aṭanga khelh ṭan tur Wim­bledon atana in­buatsaih nan Eastbourne Open ni lo inelna dang a khel dawn lo tihna a ni.

Eastbourne-ah hian kum dang zawng aiin player langsar an tel hnem dawn, hmeichhe ranking-a a sang 10 zinga pasarih zet an tel dawn, an zingah hian world number 1 Angelique Kerber pawh a tel ang.

Halep chuan, "Player ṭha an tel hnem dawn avangin inkhel hautak kan hmachhawn dawn tih chu thil chiang a ni a, hei hi Wimbledon inbuatsaihna ṭha tak a ni thei ang," tiin a sawi.