Yamaha rider pahnih an phur

MotoGP team hlun Yamaha rider pahnih Mave­rick Vinales leh Valentino Ross te chuan Pathianni tlai dar 5:30-a tlan tur Dutch Grand Prix atan an inpeih thu leh hnehna chan theih an inbeisei thu an sawi chhuak.

Rider championship-a hmahruaitu Vinales chuan, "Catalunya-ah khan hun harsa kan hmang a, 10-na ka ni phak hram. Tunah chuan chona thar hmachhawn turin Assen kan pan tawh a, he hmunah hi chuan talbuai nawn a thiang tawh lo. Podium-a kan lawn theih nan 100% in kan bei ngei ngei tur a ni, hnehna kan chan theih pawh ka beisei," tiin a sawi.

Kum 22 mi Vinales hian kuminah Qatar, Argentina leh France GP-ah te hnehna a chang tawh a, intlansiak vawi sarih an hmachhawn tawhah point 111 hmuin hmahruaitu a ni mek a, a vawi khat nan MotoGp title a beisei mek.

Intlansiak hnuhnung bera pa­riatna dinhmun luahtu Italian rider Rossi pawhin hmasawn a beisei thu sawiin, "Nikum khan Netherlands-ah hian ruah sur vangin intlansiak a harsa hle. Kuminah pawh thil thleng thei tam tak a awm a, hei vang hian kawng tinrenga inbuatsaih a ngai. Team ṭha tak kan indin tawh a, kan thawhhona ṭha hi kan vawn nun zel theih chuan podium-ah kan lawm theih ka beisei," a ti.

Kuminah rider an inel tawk hlawm hle, hmahruaitu Vinales dawt chiahah point 104 hmutu Andrea Dovizioso a awm, ani hian intlansiak hnuhnung pahnihah hnehna a chang thei.

Champion lai Marc Mar­quez (88 points) leh Dani Pedrosa (84), Rossi (83) te pawh inhnaih tawk vek an ni a, intlansiak pakhat an chetfuh dan a zirin an dinhmun a la inthlakthleng hlawk hlawk thei. Tuna Moto GP point chhiar dan hman ṭan kum 1993 aṭanga chhutin kumin hi intlansiak hmasa pasariha rider sang pangate an dinhmun a inthlah loh ber ṭum a ni.