Praneeth lakah Srikanth chungnung

Indian badminton star tun hnaia cheṭha chho mek Kidambi Srikanth chuan hmalam a pan zel. Australia Open Superseries khelh mekah nimin khan mipa singles quarterfinal khelh a ni a, Indian shuttler pahnih inkhelah Srikanth hian B. Sai Praneeth hnehin semifinal a lut.

World number 22 Srikanth hian minute 43 chhungin 25-23, 21-17 in hnehna a chang. Kumin April thla khan player pahnihte hi Singapore Open final-ah an intawng tawh a, he mi ṭum hian Praneeth a chak, tunah erawh Srikanth a dingchang zawkah a ṭang ve thung. Indian tlangval zingah a zawna Superseries semifinal lut thei hmasa ber a ni.

Kum 24-a upa Srikanth hian semifinal lut tur hian Chinese Taipei shuttler Kan Chao Yu leh world number 1 Son Wan-Ho te a hneh tawh bawk. Kar hmasa lawk khan Indonesia Open nomawi a chawi avangin Australia-ah pawh hian champion tura rinkai a ni.

Pullela Gopichand-a kaihhruai Srikanth hi Badminton World Federation ranking-ah tunhma lamin number 3 pawh a lo ni tawh a, hliam vanga a chawlh rei avang leh a result ṭhat tawk loh vangin 22-naah a tla hniam. Hyderabad tlangval hi tun hnaiah hnungtawlh aia hma lam pana a kal miau avangin ranking chhuak thar berah chuan 11-na a nei leh tawh.

Indian shuttler dang H. S. Prannoy pawhin hmasawnin number 21 a ni. Prannoy hian kar hmasa khan Indonesia Open-ah khawtual tlangval Lee Chong Wei leh Chinese legend Lin Dan a hneh thei a ni. Ajay Jayaram leh B. Sai Praneeth te erawh 15-na leh 16-naah an tla hniam thung.